Imgerut 71 - Labrador Inuttitut Heritage Bible

Tuksiarnek piulijaujomamut.

¹ Nalegak tattigivagit; kangusuktitauᴋoniatsangilaungatôk.

² Piulilaunga idluarnernut, ikajorlungalo; siutit manniuk uvamnut, piulilungalo.

³ Torᴋorviksaᴋauteôlaurit sôngojok uvamnut, ᴋemâvigitsainarungnartara, angilauktotit ikajoromagamga; igvit ᴋairtorigapkit, serngnigijiksaᴋautigigapkillo.

⁴ Gûdîk iᴋajulaunga Gûdeᴋangitut agganginnit, idluitub attanniâlojub aggâlunginnit.

⁵ Igvit nerriungnerivagit, Nâlegak, Nâlegak sungertutigijara innuosungnimnit.

⁶ Igvit tattigilaukpagit anânab timinganit, igvit anânama timinganit nussulaukparma. Nertordlernera sângnêtsainarpok.

⁷ Unnuktunnut tattamnartotut îpunga; igville sungertutigivagit sôngojok.

⁸ Kanera tattale nertordlernermik illingnik, nakorsarnermiglo illingnik uvlut tamaita.

⁹ Eginiarnanga innutoᴋaunimne; ᴋemangniarnanga sangêniaruma.

¹⁰ Omigijikka oᴋarmatta akkerartorlunga, tarnimniglo pinasuartut, ᴋachimioᴋattigêkput,

¹¹ Oᴋarlutiglo: Gûdib ᴋemakpâ; udlanigitse, tigulugolo, piuliklerteᴋangimat tagvane.

¹² Gûde ungasingniarnak uvamnit; Gudîk errinisugit ikajoromavlunga.

¹³ Kangusuglît nungutaulîllo tarnimnik akkerartortut; kangusuktitaunermut mittautaunermullo imusertaulît, ᴋanoênimnik ᴋennertut.

¹⁴ Uvangale nerriutsainaromavunga, nertortaunîllo tamât angijorortitsomavara.

¹⁵ Kanerma idluarnît oᴋautigijaksarivâ, uvlut tamaita piuliklernît; kittitsungnangitakka.

¹⁶ Arvertaromavunga Nâlekab, Nâlekab pitsartuningane; idluarnît nertoratuarijomavara.

¹⁷ Gûde igvit innuosungnimnit ajochertorlaukparma; mannalo tikkidlugo tattamnartullînitit oᴋautigivakka.

¹⁸ ᴋemangniarnangatauk innutoᴋaunimne ᴋêrtoniaruma; tallit oᴋautigilugo perᴋârtinanga ᴋittorngat ᴋittornganginut, pitsartunîllo, illunainut tikkitsomârtunnut sulle.

¹⁹ Gûde idluarnît pôktovok, pinniarnersoarnik piniartotit. Gûde kia adsigivâtît?

²⁰ Igvit tukkisitilauramga kappiaktoanermik akkulaitomik angijomiglo, annapiktiparmalo, ᴋagvertilungalo nunab ittininginnit.

²¹ Angijorortidlarparma, mannigormilungalo.

²² Tagva ᴋujagivagittauk Psalterisijarnermut nertornarnît pivlugo; imgerlunga nertorpagit Harfesijarlunga, igvit hailigeôjotit Israeleme.

²³ Kangasinâka igiaᴋomijarpûk nipliajorvigigupkit, tarnigalo piulilauktat.

²⁴ Oᴋamatauk uvlut tamaita idluarnît imgerusiorutigivâ. Illerasuktuksaungmatta kangusuktitaujuksaungmattalo ᴋanoênimnik ᴋennertut.