Imgerut 69 - Labrador Inuttitut Heritage Bible

Messiase âniajok.

Davidib imgerutâ imgerutigilugo.

¹ Gude iᴋajunga; imek tarniga tikkilugo pingmat.

² Kivivunga aᴋᴋilupingmut ittijomut tungaverᴋangitomut; tikkipunga imiksuit pârpalatsijut illuanut, ulliublo ipititsomavânga.

³ Nipliangorpunga, torkluga katjarâksimavok, tautugara nungulerpok, taimak akkunêrtigijomik uttakkijariaᴋarama Gûdimnik.

⁴ Pitjuteᴋaratik illuluktut ômisuktut uvamnik, tâpkoa unnurnersauvut nutjânit pigijamnit niaᴋumne. Sullinatik ômisuktut uvamnik asseroijullo, pitsartojoksôvut. Akkilêjariaᴋarpunga aksârnerilaungitamnik.

⁵ Gûde sillainera ᴋaujimavat, akkiliksakkalo ijersimangilet sângne.

⁶ Nerriuktut illingnik kangusuktitauᴋoniarnagit uvamne, Nâlegak, Nâlegak Zêbaot; kangusumut aupalerᴋoniarnagit uvamne, ᴋennertut illingnik, Israelib Gûdinganik.

⁷ Pivlutit mamailisartaunelijarama, kênara nâmavok kangusuktitaunermik.

⁸ Tujormijangolerpunga ᴋattangutimnut, illitarijaunangalo anânama ᴋittornganginnut.

⁹ Illungertornerub igluit pivlugo nungutimanga, oᴋauteᴋaluktullo illingnik oᴋarnerlungningita tupvigivânga.

¹⁰ ᴋêajungalo nerritaililungalo illapsungnartomik; mittautigijauvungalo tappilugo aglât.

¹¹ Attisimavunga pôksaijamik, oᴋausiovakpungalo tâpkonunga.

¹² Ittertarvingme iksivajut ᴋanneᴋadlarvigivânga, immerᴋattauvingnelo imgertigivânga.

¹³ Uvangale tuksiarpunga, Nâlegak illingnut nalliutome ᴋuvianartome; Gûde pitsiatoksonît pivlugo tussalaunga ikajornernut nertornartomut.

¹⁴ Piulilaunga aᴋᴋilupingmit, kiverᴋonanga; piulijauᴋovlunga illulugvigijimnit, imânillo ittijomit.

¹⁵ Ullitornek ippititserᴋonago, ittinerlo êserᴋonago uvamnik, ittersâlublo pânga ᴋollimne kôᴋonago.

¹⁶ Tussalaunga Nâlegak, pitsiarnît mannigornarmat; sâviginga nâpkiningnersoarnît malliklugo.

¹⁷ Kênaillo ijerniarnago pît kivgaᴋotingnit; kappiasukama tussasâlaunga.

¹⁸ Tarniga najulauruk piulilugolo, kippaludjarlaunga ômigijikka pivlugit.

¹⁹ Mamailisartaunera kangusuktitauneralo illerasuktitauneralo nallungilattit; akkerartortikka illunaita sângnêput.

²⁰ Mamailisartaunerub ômattiga serᴋomipâ kappiasuktilungalo. Uttakkivunga illapsugosuktoᴋaralloarmangât uvamnik, pittaᴋangilarle; mannigoijunniglo, nachvâtsangitungale taimaitunnik.

²¹ Sungarmik nerritipânga, sêrnartomiglo immertipânga imerungnimne.

²² Nerrivingat nigangortuksaule sângine, akkiniarutigilugolo, mikkigiarilugo pigilitsuk.

²³ Ijingit takpêlit tautuᴋonagit; koktorangillo ajalutsainarlit.

²⁴ Nâpkigosujuinernik koverikit, ningarnivîllo illungertortub tiguligit.

²⁵ Iglungit innuêrutsaulit, innuᴋaranelo tuppingine igloᴋartunnik.

²⁶ Annaulilauktet unangmingmatsuk, ikkilertavîllo ânianingit akpautigivait.

²⁷ Ajortunnut kattaᴋattarlit, perᴋonagit idluarnernut.

²⁸ Pêjartaulit inôjut aglanginnit makpertanit, idluartullo aglaᴋassiutitauᴋoniarnagit.

²⁹ Uvangale pattangavunga, âniadlarlungalo. Gûde ikajornivît sapputilinga!

³⁰ Gûdib attinga nertoromavara imgerumut, angijomiglo opigijomavara ᴋujalinermut.

³¹ Tamana Nâlekab ᴋuvianarnersariniarpâ tuktuvangmit, naksulingmit kukkilingmillo.

³² Pattangajut takᴋovât ᴋuviasulutiglo; Gûdemiglo ᴋennertut ômattingit ômaniarput.

³³ Nâlekab aklujut tussarmagit, parngnanairsortaumajoᴋotinnelo nachogingilait.

³⁴ ᴋillaublo nunablo, imarbiksublo, tamaitalo aulajut tâpᴋonane nertorlitsuk.

³⁵ Gûdib Zione ikajorniarmago Judablo iglugasaksoangit iglugaseliorniarpait, tagvane igloᴋartoᴋarᴋovlugo, perᴋutigijauᴋovlugillo.

³⁶ Kivgangitalo kinguvângita kingormgutijomârpait; attinganiglo naglingniktut tâpᴋonanêtuatsainaromârput.