Imgerut 68 - Labrador Inuttitut Heritage Bible

Gûdib nallojungnaititsininginik ânanânik. Takkosarnek Kristusib killaliarninganik ânanaudlartomik.

Davidib imgerutâ imgerutigilugo.

¹ Gude makkile, ômigijingit siamartitauᴋovlugit, illulugvigijingillo ᴋemâlugo perᴋovlugit.

² Pêjarkit, sorlo isserluk pêjartaungmat; sorlo igupsaujârtut orksungita tangit auksilermatta ikkomamut, taimak Gûdeᴋangitut nungutaujuksauvut Gûdib sângane.

³ Idluartulle ᴋuviasuktuksauvut, serrijariaᴋarlutiglo Gûdib sângane, ômamullo erᴋiêrtoriaᴋarput.

⁴ Gûde imgervigissiuk, attinga nertorlugo imgervigissiuk, Apᴋosineliorsiuk, tâmna sunaᴋajuitutigut pijok tamaunga; Nâlekamik atteᴋarpok; igiaᴋomijaritselo sângane.

⁵ Atâtaujok illiârsungnut, idluarsaijôjorlo uigarnernut; Gûdeojok inimine ivsornaitome.

⁶ Gûdeôjok ᴋittorngisuitunnik tunnijijok ᴋittornganik iglungit tattalugit; parngnanairsortaujunnik annitsijok nalliutome idluartome, ᴋemaijuniglo (Nâlekamik) ajoksarnartovingmêtsainarᴋojijok.

⁷ Gûde inuᴋotivît sivurngane ingergalauravit, arvertalauravit, sunaᴋajuitome, Sêla.

⁸ Tagva nuna sajukpilulaukpok, ᴋillaillo kussilaukput Gûdib sângane; Sinai tâmna, Gûdib, Israelib Gûdigijangata sângane.

⁹ Sillalungnermik nakkoksinartomik kovisilaukpotit Gûde, kingormgutijallo nukkingerotisimalauktut nukkiksalaukpâttit.

¹⁰ Kattimgajoᴋotitit inneᴋalaukput tagvane. Gûde pattangajut nakkoksitipâttit pitsiarnernut.

¹¹ Nâlekab oᴋautsit tunnivait oᴋalajutigut oᴋautsinik tussarnertunnik amisutigut.

¹² Kattimgajoksuit attaningit ᴋemâmavut, ᴋemâmavut! arnablo aulatsijub iglome aksârnigaujut aviklugit aitutigivait.

¹³ Avalut illuane merngoêrserupse, tagva keblerneᴋarpok Taubit esarungititut, Silberemik sillapârsimajut, merᴋoᴋartullo, Goldemik tungojortamik sillapârsimajunnik.

¹⁴ Ajugaᴋangitok attannernik siamartitsikpat tagvane, tagva ᴋannerpok Zalmonib ᴋaᴋᴋangane.

¹⁵ Gûdib ᴋaᴋᴋanga ᴋaᴋᴋauvok pitsornartok, ᴋaᴋᴋauvok kingiktok pitsornartorlo.

¹⁶ ᴋaᴋᴋaujose kingiktose sôg takkosarᴋise? Gûde ᴋuviasuteᴋarpok ᴋaᴋᴋame ômane ineᴋaromavlune, Nâlegarlo tagvanêtuatsainarivok.

¹⁷ Gûdib aksalloaleᴋotingit, tausendit tausendertorlugit unnuktigijôvut; Nâlegak tâpkoa akkornganêpok Sinaimêtut ivsornaitome sorlo.

¹⁸ Igvit ᴋongmuarsimavotit, parngnanairsimavik parngnanairsortautilaukpat, tunnergusiannik pilaukpotit innungnut illingajuksanik, ᴋemaimajunnuttauk, Gûde Nâlegak tagvane inneᴋarᴋovlugo.

¹⁹ Nâlegak nertortaule uvlut tamaita. Gûdib nangmagaᴋartipâtigut, ikajorpâtigulletauk, Sêla.

²⁰ Gûdeᴋarpogut ikajortemik, Nâlegaᴋarlutalo Nâlekamik, piuliklertemik toᴋᴋomit.

²¹ Gûdible ômigijime niaᴋungit egilugit serᴋomitsomârpait, tâpkoa ᴋabsingit, agvertaranertut passijaksaunermingne.

²² Nâlegak oᴋarpok: Basanemit uttertitsomavakka; uttertitsomavakka imarbiksub ittininginnit.

²³ Ittigarnik missukserᴋovlutit aungmut, kingmiᴋotivîllo oᴋangit alluktorᴋovlugit tamattôminga ômisuktunnit.

²⁴ Takkuksauvok ᴋannok igvit Gûde ingeraravit, ᴋannok igvit Gudiga attanneralo ingeraravit ivsornaitovingme.

²⁵ Imgertut sivurliovlutik arvertarput, tungâne noᴋakseralingnik attortut niviarsijat ᴋillausijartut akkorngane.

²⁶ Gûde nertorsiuk kattimaniksane, Nâlegak, illipse Israelib puailavinganit pijose.

²⁷ Tagvanêpok Benjamin mikkijok attaningat, Judakut angajoᴋângit, kattimgajoksoatik illagilugit; Sebulonekut angajoᴋângit, Naftalikut angajoᴋângit.

²⁸ Gudivît nâlegauvît âᴋilaukpâ; sôngolerit Gûde piniarnerne uvaptingnut.

²⁹ Tempeleᴋotit Jerusalemêtok pivlugo attannît pilliutinik âtsiviginiarpâtit.

³⁰ Omajok ivît suvluggit akkornganêtok suaruk, angasalluit unurningit, innuᴋattigêksuit nochangita akkorngane pâmakterᴋovlugit, kênaujanik Silbereôjunik najorteᴋarlutik. Tâpsoma innuᴋattigêksuit unatarosuktut siamartipait.

³¹ Egiptenemiut angajoᴋângit tikkitsomârput, Etiopiamiut aggatik issagomârpait Gûdemut.

³² Attaniôviôjose nuname, Gûde imgervigissiuk, nertordlerluse Nâlegak imgervigissiuk, Sêla.

³³ Tâmna ingergajok ᴋillait ᴋillangita ᴋângine pigiarnermit. Ahâk kallungne aularᴋoniarpâ, pitsartunerub kallunga.

³⁴ Gûde pitsartuneᴋarle. Tâpsoma ânanauninga Israelib kanganêpok, pitsartuningalo nuvujanêpok.

³⁵ Gûde tattamnarpotit ivsornaitoveᴋotingne. Gudeôvok Israelemut, sôngonermik pitsartunermiglo tunnijijok inugasaksoarnut. Gûde nertortaule.