Imgerut 66 - Labrador Inuttitut Heritage Bible

ᴋajungersainek Gûde opigilugo ᴋujagilugolo tassiorningninga innuᴋutiminik pivlugo.

Imgerusek imgerutigilugo.

¹ Nunaujose illunase Gûde igiaᴋomijarvigissiuk,

² Attingata opinarninga imgerutigissiuk, nakorissiuk ânanaudlartomik:

³ Gûde oᴋautissiuk: Ila tattamnadlarput pinniarnitit! Omigijivit ᴋennuviginiarpâtit pitsartunersoarnit pivlugo.

⁴ Nunab illunât tuksiarvigilitit, imgervigilitillo nertordlerutiksanik; attit imgervigilitsuk nertordlerutiksânnik, Sela.

⁵ ᴋaititse tamaunga takkonârluselo Gûdib pinniarninginnik, tattamnadlartub pinniarnermine Inuit ᴋittorngangita akkorngane.

⁶ Tâpsoma imarbik ablatsangortipâ ipterilingajomut; kôksoakut pissuklutik pivut; tamanna ᴋuviasutigivavut tâpsomane.

⁷ Attanniôtivok pitsartunerminut issoᴋangitomut, ijikita innuᴋattigêksuit takkonârpait. ᴋemaijut tâpsominga angijorortitsungnarniangilat, Sêla.

⁸ Innuᴋattigêksoangojose Gûdivut nertorsiuk, nertortauninga tussartaule.

⁹ Tarniptingnik inôsainartitsijok, ittikaptingniglo koitartailititsilune.

¹⁰ Igvit Gûde ôktulauraptigut êpᴋejarlutalo sorlo Silbere illaᴋarungnaititaungmat.

¹¹ Nuvogusermut parngnanairsortautilaukpaptigut, oᴋumailutamik illijilaukpotit makkitiptingnut.

¹² Innungnut pergauᴋolaukpaptigut niaᴋuptigut, ikkomame imânelo ilaukpogut; igville annilaukpaptigut, nakkoksitilutalo.

¹³ Tamanna pivlugo iglungnut aijomavunga tunnergutiksalijarlunga ôtaksanik, akkilêvigijomavlutillo angernerilauktamnik;

¹⁴ Sorlo kangasinâka aitarlaurapkik, sorlolo ᴋannera oᴋalaungmat kappiasungnimne.

¹⁵ Tunnergutinnik ôtaksanik orksulingnik tunnitsivigijomavagit, saukat angusallunginit pujôktunit; tunnijijomavunga tuktuvângnik, angusalluit illautillugit. Sela.

¹⁶ ᴋaititse tamaunga, tussaluselo, illunase Gûdemik sivôrajose, unipᴋâromavunga sumik tâpsoma pinnialauktanginnik tarnimnut.

¹⁷ ᴋanimnut nipliavigilaukpara, nakorsarnerlo mânna oᴋamnêpok.

¹⁸ Omattimne idluangitomik ᴋajusimanajaruma, Nâlekab tussarajatsangilânga.

¹⁹ Gûdible tussalaukpânga, kamagilugolo ᴋennunima nippinga.

²⁰ Nertortaule Gûde tuksiarnimnik nacholungitok pitsiarnerminiglonêt allailungitok uvamnik.