Imgerut 65 - Labrador Inuttitut Heritage Bible

ᴋujalitiksât nertordlerutiksâllo Gûdib ajungitulliningit pivlugit.

Davidib imgeruta imgerutigilugo.

¹ Igvit, Gûde nertortauvotit innilanganerme Zioneme, igvillo akkilêvigijauvotit angervionernik.

² Igvit tuksiarnernik tussarpotit, tamanna pivlugo uviniggit illunatik opaᴋpâtit.

³ Idluitullinipta nênidlarpâtigut; igvit ajornivut issumagijungnailaukittôk.

⁴ Pilloridlarpok igvit annerijet, inneᴋarᴋojello iglorusingne. Namaksijautitigut iglovît, Tempeleᴋotivît perᴋutinginut.

⁵ Kappianarlutit idluarnerme, kiojomavaptigut, Gûde piulijaujutiksavut, sungertutiksaujotit nunaksub issunginnut ᴋanningitunnut tamainut, imarbiksoarmullo.

⁶ ᴋaᴋᴋanik atsungersijok pitsartunerminut, tapserusersimajorlo sôngonermik.

⁷ Imarbiksub iktullijaninginik saimarsaijotit, mallingita iktullijarninginik, innuᴋattigêksuillo perajarludlarninginik.

⁸ Nunaᴋartut issungne nallonaikutatit kakkilârutigilugit perᴋovlugit. Nertordlertipâttit aulajut, tamangne uvlâkut unnukullo.

⁹ Nuna nallipsarpat, imeᴋartilugolo, akluitidlarlugolo. Gûdib puailaviârsunga imeᴋarpok nâmamariktomik. Tâpkoa ᴋaᴋᴋôjaksaᴋotingit perutsiaᴋovâttit, tâmna nunna taimak âᴋiᴋsolauᴋârungne.

¹⁰ Perorsêviub ittersangit imertipâttit, makpiterarsimaningillo manniksarpâttit; sillalungmut aᴋᴋitipet, perortungillo pitsornartipâttit.

¹¹ Igvit Jare pinarnartipat pitsiarnernut, ittikkavillo tumingit orksumik kusserput.

¹² Sunaᴋangitub perorsêvingit orksuliovut ᴋutteᴋarlutik, ᴋaᴋᴋârulaillo ᴋuviasukput.

¹³ Naternait nâmavut sauᴋânik naksallo ᴋaᴋᴋôjaksaᴋarput akkulaidlartunnik; igiaᴋomijartoᴋarpok imgertoᴋarlunelo.