Imgerut 63 - Labrador Inuttitut Heritage Bible

Tussunek kivgartornermik Gûdemik, idluartomik.

Davidib imgerutâ, Judakut sunaᴋajuitunganêdlune.

¹ Gude, igvit Gûdigivagit; uvlârârsukut ᴋenneromavagit; tarnima kêniarvigivâtit, uviningma ᴋêmitigvigivâtit nuname ipterilingajome, pannertomelo immeᴋangitome.

² Tagvane illingnut takkosarpunga ivsornaitovingmêtotit, takkojomadlarama ajugaᴋanginernik, opinarnerniglo.

³ Saimarveᴋarnît namanersaungmat innôtsemit. Kangasinângma nakorijomadlarpâtit.

⁴ Taimak nertoromanajarpagit innôsera nâvlugo, aggakkalo ᴋollangiutitilugit atterne.

⁵ Tagva tarniga namaksinajarpok orksumut orksulingmullo sorlo, ᴋanneralo kangasinângnut ᴋuviasuktungnut nertordlerajarpok.

⁶ Erᴋaumajarangapkit inangavimne, tagva oᴋautigivagit unnuab pigârvingit nâlugit.

⁷ Igvit ikajortigigapkit, esarokpîllo tachaliningane nertordlerpunga.

⁸ Tarnima ungagivâtit, aggakpît tallerpikpît pattangaitipânga.

⁹ Taipkoale asseroinasuartut tarnimnik, ijukariaᴋarput nunab ittininginnut.

¹⁰ Tunnijauniarput sâviksoarmut, terrianianut illinganiarput.

¹¹ Attannerle ᴋuviasungniarpok Gûdeme; illunatik nertorniarput angeruteᴋartut tâpsominga; ᴋannit saglojut simiktaujuksaungmatta.