Imgerut 62 - Labrador Inuttitut Heritage Bible

Ingilanganek Gûdib sângane.

Davidib imgerutâ imgerutigilugo Jedutunemut.

¹ Tarniga innilangavlune uttakkivok Gûdemik; tâpsomangat ikajortaunera pivok.

² Tâmna ᴋairtorivara, ikajortigilugolo, sapputsauvigilugolo, angijomik aulaniarᴋonanga.

³ ᴋannok akkunêrtigijomik illunase attausek unangmivissiuk, inosêrotitsomavlugo, iglub sannerangatut ochungajotut, ᴋarmaktullo serᴋomisimajotut?

⁴ Kachimioᴋattigêtuinarput ᴋannok pôktoninganit ajâktoromavlugo, saglonernik attaruilivlutik, saimartitsivut ᴋanermut, ômamele ôᴋarnerlotjivut, Sêla.

⁵ Tarnîk, innilangalutit Gûdemik uttakkituinarit; nerriungnera tâpsomangat pingmat.

⁶ Tâmna kissiat ᴋairtorivara, ikajortigilugolo, sapputsauvigivaralo aulaniarᴋonanga.

⁷ Piulijauviksara nertornautiksaralo Gûdemêpûk; pitsartunima ᴋairtunga, tattiksara Gûdemêpok.

⁸ Inôjose tattigitsainarsiuk sorairase; ômattise nâvissigik sânganut; Gûde tattigivavut, Sêla.

⁹ Innuille ᴋittorngangit sunaungimarikput; Inuit pijariaᴋortojut saglopakputtauk; kiktitautingne oᴋinersauvut sunaungitomit unnuktôgalloarlutik.

¹⁰ Aksorornermut aksârnigaujut sungertutiginiarassigik, tattekaraselo ivartaujunik. Akluinermik tunnitsiviogupse, ômattise ungaᴋoniarassigik tamattominga.

¹¹ Gûde oᴋauseᴋalaukpok tussaᴋattartamnik: Gûdib pitsartunek pigingmago.

¹² Igvillo Nâlegak saimarviᴋarpotit; illunaita attunit akkilêvigigangne pinniarningit malliklugit.