Imgerut 59 - Labrador Inuttitut Heritage Bible

Tuksiarnek ikajortaujomamut Gûdemut ômisuktut sôngojut akkerartorlugit.

Davidib ivlerijanga, asserorᴋonago; Saul tilliklertillugo, iglungalo udsertortauᴋongmago, toᴋᴋotsomavlugo.

¹ Piulilaunga Gûdîk, ômigijimnit, sappumijarlungalo akkerartortimnit.

² Piulilaunga idluitullijunnit, ikajorlungalo auruktunnit!

³ Ahâgle Nâlegak, tarniga terliarasuarpât; sôngojut kattimalerput akkerartorlunga, idluitullineᴋarnanga ajorneᴋarnangalo.

⁴ Pitjutaunanga akpangerput, oppalungaijarlutiglo. Tuppagit pachrearomavlunga takkolutillo!

⁵ Ila igvit Nâlegak Gûde Zêbaot, Israelib Gûdinga, tuppagit, nallojullo illunaita nallipsarkit; idluitullijut nertornangitut tâpkoa nalliallonêt saimarviginiarnago pît, Sêla.

⁶ Unnungme utterniarput, miugôrlutiglo kingmititut, akpangerniarlutiglo sunatuinarnut iglugasaksoarne.

⁷ Ahâk oᴋagallakput ᴋanneᴋadlarlutik; saviksoaᴋarpok kangasinângine: kiale tussaralloarᴋaûk?

⁸ Igville Nâlegak ijoriniarpâttit, nallojullo illunaita mittautiginiarpâttit.

⁹ Pitsartuningit pivlugit tattigivagit; Gûde sapputsauvigigapᴋo.

¹⁰ Gûdima pitsiarningata pachrearpânga; Gûdib ᴋuviasutiksamnik takkoᴋovânga ômigijikka pivlugit:

¹¹ Toᴋᴋotailikit, innuᴋotikka puigorᴋonnagit tamattominga, siamartikille pitsartunernut, ijuᴋartilugillo unnunga, Nâlegak sappulutarijavut.

¹² Kangasinângita oᴋausingit ajornetuinauvut; tamanna pivlugo angujaujuksauvut pimariuterninginne, oᴋarnerlotjiningit, saglonerillo unipkautigijangit pivlugit.

¹³ ᴋaningajârlutit nungukit; nungukit sunaungerᴋovlugit tukᴋiserᴋovlugillo Gûde attaniojôngmat Jakokune sillaksub nâninga tikkidlugo. Sêla.

¹⁴ Unnungme utterniarput miugôrlutiglo kingmititut, akpangerniarlutiglo sunatuinarnut iglugasaksoarne.

¹⁵ Akpangerniarput sunatuinarnut, nerᴋiᴋsat pivlugit, okaloᴋiniarlutiglo aᴋᴋeartorlungikunnik.

¹⁶ Uvangale pitsartunît imgerutigijomavara uvlâkullo pitsiarnît nertoromavara; igvit sapputsauvigigapkit, ᴋemâviksarilutillo kappiasungnimne.

¹⁷ Igvit pitsartutigijagit imgervigijomavagit; Gûde sapputsauvigigapᴋo, Gûdigivaralo nâpkigosuktok uvamnik.