Imgerut 55 - Labrador Inuttitut Heritage Bible

Arusungnek ᴋattangutit nallangaitut pivlugit.

Davidib illisaininga imgerutigilugo noᴋakseralingnut.

¹ Gude tuksiarnera tussalauruk, ᴋennunikkalo ergutiniarnagit.

² Kamagilaunga tussarlungalo, ᴋannok ârusungnimne maksoasuêrama ᴋêadlarlungalo;

³ Omisukte taimak nipliadlarmat, Gûdeᴋangitorlo tattingmat; ᴋanoêtomik aksaᴋâtitsivigingmanga, ômamullo ômigivânga.

⁴ Omattiga kappiasukpok timimne, toᴋᴋublo erksinarningita tupvigivânga.

⁵ Sivuranermut sajungnermullo pijauvunga, ᴋêongomijarnerublo ullikpânga.

⁶ Oᴋalaukpunga: ᴋannoktôk esaroᴋarlanga Taubititut, ovangat tinginajarᴋovlunga utternangalo.

⁷ Ahâk, tagva ᴋemâjomadlarajarpunga, sunaᴋajuitomêtsainaromalungalo. Sêla.

⁸ Errinisugajarpunga annigoerᴋovlunga akᴋonaksoarmit sillarnerlungmillo.

⁹ Ekit Nâlegak, oᴋangillo adsigêgungnaitikit; pinniarlungnernik akkerartornermiglo takkogama iglugasaksoarne;

¹⁰ Taimailiorsajoᴋarpok uvlôtillugo unuamelo avaluksoangita ᴋângine, siorniorneᴋalunelo, sullijaksaᴋalarmelo takkamane tâpᴋonane;

¹¹ ᴋanoêtoᴋartitsinek attanniotivok takkamane; sagloᴋitsinek uivêriklernerlo nûlungilâk apᴋosininginnit iglut akkornganêtunnit.

¹² Omigijimaungitub mamailisarmanga, tamana ᴋenuêrsarutiginajartara; illulugvigijimaungitub angutauservigivânga, tagva ijerajarpunga.

¹³ Igville uvaptun înasugijauvotit, illanârijigivlutit, pairijigivlutillo, illagijigivagit.

¹⁴ Illanârêlunuk ᴋachimioᴋattigêlauktoguk, arvertalauklunuglo kattimgajut akkorngane Gûdib iglunganut.

¹⁵ Toᴋᴋomut opingartaulît, inôvlutik kappianartovingmut ijukarlît; kassêneᴋarmat iglungine, ômattinginne.

¹⁶ Uvangale Gûdemut ᴋaigarsugomavunga, Nâlekablo ikajorniarpânga.

¹⁷ Unnuktillugo uvlangotillugolo ᴋetterartillugolo ârusugomavunga ᴋêajomalungalo; tagva nippiga tussarniarpâ.

¹⁸ Tâpsoma tarniga piulivâ merngoêrserneᴋartilâlo tâpkonangat uvamnûromajunnit; akkerartortikka unnudlarmatta.

¹⁹ Gûde tussarniarpok mannigotitiniarpaillo; tâpsoma iksivajub tagvane itsaksoarmit, Sêla. Ablatsângorniangimatta, Gûdelo sivuragingilât.

²⁰ Aggatik illivait illanârijanginnut, angersimaningalo serᴋomipât.

²¹ Kanningit piarnarnersauvut imub orksuanit unatadlarnerlo ômattinginêpok; oᴋausingit kettulinersauvut orksumit, saviksoatuinaugalloarpullo.

²² Tussunitit pitikit Nâlekamut, tâpsoma pattangaitiniarpâtit, idluartorlo inilangajuinermêtsainarᴋoniangilâ soraijuitomik.

²³ Igvillo Gûde ijuᴋartitsomârpâttit ittersâlungmut. Auruktut nallangaitullo inôtsimik ᴋetterarningit angujomângilait; uvangale tattigivagit.