Imgerut 51 - Labrador Inuttitut Heritage Bible

Tuksiarnek issumagijaujungnainek ajortunnit pivlugo.

Davidib imgerutâ imgerutigilugo; Nallautaijub Natanib tikkingmago, Batsebamut ittilauᴋârmat.

¹ Gudik saimarviginga pitsiarnît malliklugo, tappanikkalo pêjarkit napkiningnît angijoksoak malliklugo!

² Ubvatsialaunga idluitullinimnit, êpᴋejarlungalo ajornimnit

³ Idluitullimanera illitarilerapᴋo ajortullimaneralo sâmnêtsainarpok.

⁴ Illingnut kissiane ajortullilaukpunga, idluitullilarmalo sângne, igvit idluatsainarᴋovlutit oᴋauserne ivsornaitsiarᴋovlutillo erᴋartortauguvit.

⁵ Ahâk kinguvângnit ajortolingnit ernertarijaulaukpunga anânamalo ajorneᴋarlune erniarilaukpânga.

⁶ Ahâk, mikseᴋârnek sagvangitomêtok ᴋuviagivat; illisimanermik ijersimajomik ᴋaujimatiparma.

⁷ Ajortoêrotilaunga Isopemut ivsornaiᴋovlunga; ubvalaunga ᴋaᴋornersaulerᴋovlunga apumit.

⁸ Tussarᴋolaunga ᴋuviasungnermik erᴋiêrtornermiglo, saunit serᴋomilauktâttit ᴋuviasulermerᴋovlugit.

⁹ Kênait ijilauruk ajornimnit, idluitullinikkalo illunaita pêjarkit.

¹⁰ Gûde ômamik ivsornaitomik sannalaurit illumne, tunnitsivigilungalo annernermik nutâmik nakkimarnijuitomik.

¹¹ Pingujarniarnanga kênarnit, aksârtaililaungalo annernernik ajunginermik.

¹² Manigulaungminga ikajornernut, annernermullo ᴋuvianartomut maksoatilaunga!

¹³ Tagva tappatôjut apᴋosinernik ajochertoromavakka, idluitullijut sâlerᴋovlugit illingnut.

¹⁴ Piulilaunga akkiliksaᴋarnermit aungmik, Gûde, Gûdigijagit, piulijigijagillo, oᴋara idluarnernik nakorsarᴋovlugo.

¹⁵ Nâlegak kangasinâka aitartikik, ᴋannera nertornarnernik oᴋâlaᴋovlugo.

¹⁶ Tunnergutit ᴋuviaginginangne, taimainajarpat taimaitunnik tunnitsivigijomagalloarpagit; tunnergutillo ôtaksat namagingilattit.

¹⁷ Tunnergutit Gûdib ᴋuviagijangit, annerniôvut serᴋomisimajok; ômamik kappiasuktomik serᴋomisimajomiglo igvit Gûde nachoniangilatit.

¹⁸ Zione ajungitullivigiuk saimarveᴋarnît malliklugo; Jerusalemib avaluksoangit sannalaukit.

¹⁹ Tagva idluarnerub tunnergutingit ᴋuviaginiarpâttit, tunnergutit ôtaksat, tunnergutillo illuitut; tagva tuktuvait tunijauniarput Altareᴋotingnut.