Imgerut 5 - Labrador Inuttitut Heritage Bible

Tuksiarnek ikajortaujomamut Gûdeᴋangitut akkerartorungnarlugit.

Davidib imgerutâ idluartut Gudeᴋangitullo kingormgutijaksangit imgerutigilugit.

¹ Nalegak, oᴋautsikka tussarkit, oᴋâlanikkalo kamagitsiarlugit pît!

² Niplianera tussalauruk, attanîk, Gudîklo! sângne tuksiaromagama.

³ Nâlegak uvlârârsukut nippiga tussalauruk; uvlârârsukut sâvigijomavagit naipertoromalungalo.

⁴ Gûdeunginavit ᴋuviasuteᴋartok Gudeᴋangitut illusinginik; ajortok sângnêtsungnangilak.

⁵ Pimariutertut ijikpît sângangnêtsungnangilât; idluitullijut illunaita ômigivâttit.

⁶ Saglojut nungupâttit; Nâlekab aungnik pinasuartut, nallangaitullo makkojugivait.

⁷ Uvangale iglungnut itteromavunga pitsiartoksônît pivlugo, tuksiaromalungalo Tempeleᴋotit ivsornaitok sângalugo sivuranerme illingnik.

⁸ Nâlegak tassiorlaunga idluarnerne, omigijikka pivlugit; apᴋosinît âᴋiksolauruk sivunimne.

⁹ Taipkoa ᴋanningine mikseᴋârneᴋangimat; illumigijangit idluitoksôvut, torklungit illuvektut angmarsimajotun îput, oᴋamingnullo takkomôrput.

¹⁰ Passikit Gûde, ᴋajusimanermingnik allaiᴋovlugit, ajâktorkit tappatojoksôningit pivlugit, kepêservigingmattit.

¹¹ Illunatik tatteᴋartut illingnik ᴋuviasuglît; soraijuitomik nertordlerlît, igvit serngnigigangne; serrilerlît illingne, atternik naglingniktut.

¹² Igvit Nâlegak idluartut pitsartutigangne; niakoserpâttit saimarvionermik sappulutarmut sorlo.