Imgerut 49 - Labrador Inuttitut Heritage Bible

Sillaksub innungita pilloringningat toᴋᴋome naggateᴋarpok.

Kôrab ᴋittorngangita imgerutingat imgerutigilugo.

¹ Nalagitse inuᴋattigêksoangôjose illunase;

² Kamatsiaritse sillaksoarmiôjose illunase, tamarmik inutuinait, angajoᴋajallo, akluitut aklujullo illagêkluse:

³ Kanera illissimanermik oᴋartuksauvok, ômattimalo issumaksarsiorutingit sillatuniôvut.

⁴ Siutiga manijomavara adsiujunnut. Harfelo attorlugo nallaupsarutiksakka nallonairtitsomavakka.

⁵ Sôg erksijuksauvîk uvlune idluitune, tullerartima idluitulliningita illumakpânga?

⁶ Perᴋutimingnik sungertuteᴋartut, akluinermingniglo pimariuterutiksaᴋârtut.

⁷ Taipkoa nalliatalonêt ᴋattangutine piulijungnangimago; sattutiksamiglonêt Gûde tunitsivigijungnangilâ tâmna pivlugo.

⁸ Akkitoluadlarmat sattutiksak tarningit pivlugit, sapperpaillo issoᴋangitomut;

⁹ Innôtsainarmarᴋovlugo ittersamiglo takkoᴋonago.

¹⁰ Takkogame sillatôjut toᴋᴋomattatauk sillaitutitut illissimaitutitullo, perᴋutitiglo ᴋemagariaᴋarmagit assimingnut.

¹¹ Tamadsa omattingita issumangit iglutik issoᴋangitomut îtsainarniarmatta, innitiglo soraijuitsainarniarmatta, attingit nertortauniarmatta nuname illunâne.

¹² Taimaigalloarmat taimak nakorijautsainarungnangilat, nergjutitulle pêrtaujuksauvut.

¹³ Pinniarningit tâpkoa sillainiotuinauvut; taimaigalloarmallo kinguvângita nertorutigivât ᴋannermingnut. Sêla.

¹⁴ Nallavut kappianartovingme saukatitut, toᴋᴋub mikkikpait; idluitaillijulle attanniotivut tâpkonunga uvlarârsukut; tautungit nungutauvut kappianartovingmut, tokkaviksaᴋaratiglo.

¹⁵ Gûdible tarniga piuliniarpâ kappianartoviub pitsartuninganit; illaliormanga, Sêla.

¹⁶ Sivôrajutiginiarnago, kina akluileralloarpat, iglungata ânanaudlarninga angijoksôgalloarpat.

¹⁷ Toᴋᴋomine sunamik naksarniangimat, ânanaudlarningatalo mallingniangilâ.

¹⁸ Tarnine saimartigalloaruniuk inosermine, nertoralloarpattillo ajungitullivigilauravit.

¹⁹ Ainiarpok atâtagijame kinguvânginut, ᴋaumajomik takkojomâtsangitunnut.

²⁰ Ila inuk opigijaugune sillatuneᴋaranelo, tagva nergjutitun îpok nungutauniartotun.