Imgerut 48 - Labrador Inuttitut Heritage Bible

Zionib ᴋuviasungninga Nâlekab ikajorninga sapputsiningalo tâpkoninga pivlugik.

Kôrab ᴋittorngangita imgerutinget.

¹ Nalegak angijôvok, oᴋausiongînadlarlunelo Gûdipta iglugasaksoaᴋotinginne, ᴋaᴋᴋakotingane.

² Zionib ᴋaᴋᴋanga nuitatsiarpok, nunab illunât ᴋuviasutigijanga, sivinganingane tachanêput attaniviksub iglugasaksoangit.

³ Gûde tâpkoa igloksoangine illitarijauvok sappulutatut.

⁴ Ahâgle attanît kattimalaukput illagêklutiglo (nuna) ulligarpât.

⁵ Tâpkoa takkovut, tagva tattaminiarput; kakkilâdlarput ᴋemâlutiglo.

⁶ Sajungnermut tikkitaulaukput tagvane, kappiasungnermullo ernisuktotut sorlo,

⁷ Unangârmut, umiaksoarnik serᴋomitsijomut.

⁸ Sorlo tussalaurapta takkovavut mânna Nâlekab Zêbaotib iglugasaksoaᴋotingine, Gûdipta iglugasaksoaᴋotingine; Gûdib tâpkoa pairitsainarpait issoᴋangitomut. Sêla.

⁹ Gûde pitsiarnît erᴋaumavavut Tempeleᴋotingne.

¹⁰ Gûde sorlo attertut, taimaktauk nertornarnît tôkpok sillaksub issuanut; tallerpît tattapok idluarnermik.

¹¹ Zionib ᴋaᴋᴋanga ᴋuviasukpok, Judablo panningit serrivut, idluarsainitit pivlugit.

¹² Zione illumagissiuk, ᴋaivalerlugolo, nuvogusingit kittissigik;

¹³ Avaluksoangit kemergosigik, igloksoangit arvertarvigissigik, oᴋautigilugit perᴋovluse kinguvâksannut, pijomârtomêtunnut.

¹⁴ Gûde tâmna Gûdigitsainaraptigo issoᴋangitomut: tâpsoma tassiorpâtigut toᴋᴋo tikkidlugo.