Imgerut 45 - Labrador Inuttitut Heritage Bible

Nâlekab saimartitangata imgerutâ nullianiksiut.

Kôrab erningita imgerutât imgerutigilugo, paunaujaujartut pivlugit, illissainek, nagligijaujut imgerutât.

¹ Omattiga auladlarlune imgerusiorpok ânanâmik; attannek imgerutigijomavara; oᴋara aglatsiartib aglautigiva.

² Igvit ânanaunerpangôjotit Inuit ᴋittorngangita akkorngane, pitsiarnek kovijaumavok kangasinângnut; tamanna pivlugo Gûdib saimartipâtit issoᴋangitomut.

³ Saviksuit tapseruserutigiuk makkitikut angutaudlartotit, pinnanarsitilutillo ânanâmik;

⁴ Sâlaᴋarlutillo arvertarit mikseᴋârnek idluarnerlo illanersârtok pivlugik; tagva tallit tattamnartunnik saᴋᴋêniarpok.

⁵ Karᴋjuᴋotit ikpikput, innuᴋattigêksuit ochoᴋovlugit attingnut; attaniub ômigijingita ômattinginnut kibligutivut.

⁶ Gûde iksivautat issoᴋangitomit issoᴋangitomut îtsainarpok; nâlegauvikpît ajaupianga opigijaujutiksak naggovlune opigijautiksauvok.

⁷ Idluarnek ivlerivat, illuserlungnerillo ômigivâttit; tamanna pivlugo Gûdib, Gûdivit mingoarlaukpâtit ᴋuviasungnerub orksutânut, piluartomik illangnit.

⁸ Annorâtit illunatik Mirreôvut, Alloeôlutiglo, Kezeaôlarmiglo; igloksuit illuanit, Elefantit tôganginnit sannamajut, attornermut noakseralingnik ᴋuviasuktitauvotit.

⁹ Attanît panningit ânanauᴋotigivattit, nulliat nangerpok tallerpikpît tungâne anorârsimavlune Goldemik Ofiremit pijomik.

¹⁰ Pannîk nâlagit, takkonârlugo pît, siutikik mannikik: innuᴋattigijâttit atâtavîllo iglomioᴋattingit puigorkit,

¹¹ Tagva attanniub pinarnarnît ᴋuviaginiarpâ; tâmna nâlegarigangne, igvillo tuksiarvigijaksarivat.

¹² Zôrib paniata pilliutilijarlune kênait tuksiarviginiarpâ, akluitut innugasaksuit akkorngane.

¹³ Attanniub pannia ânanaudlarmarikpok illuane; annorângit pinarnarsijauvut aglaksaijânnut Goldeojunnut;

¹⁴ Annorâlijarlune taksapatânik tassiortauvlune âtauvok attannermut; uigasuit mallikpât, illagijangit âtauvut illingnut.

¹⁵ ᴋuviasungmut igiaᴋomijarnermullo tassiortauvok; itterpok attanniub igloksoanganut.

¹⁶ Ernitit atâtagilauktavit inninginnêtsomârput, tâpkoa attaningortitsomârpâttit nunaksoarme illunane.

¹⁷ Attit erᴋaumajomavara ᴋittorngânit ᴋittorngât ᴋittornganginut, tamanna pivlugo innuᴋattigêksuit nakoritsainaromârpâtit issoᴋangitomut.