Imgerut 44 - Labrador Inuttitut Heritage Bible

Gûdib inuᴋotingita ârusungningit ômisuktut oᴋumaititsiningat pivlugo.

Kôrab erningita illisainingat imgerutigilugo.

¹ Gude siutiptigut tussalaukpavut, atâtagijapta unipkautigilaukpait uvaptingnut, pinniarnerilauktâttit taipkoa nalliuningine itsaksoarme.

² Aggangnut nallojut aulartilaukpâttit, taipkoale ineᴋartilaukpâttit; innuᴋattigêksuit asserorlaukpâttit, taipkoale siamartilaukpâttit.

³ Nuna saviksoarmingnut nangmineliutiluangimatsuk, tallingitalo iᴋajulaungilait, tallerpikpîlle, tallivîllo kênavîllo ᴋaumaningata; igvit ᴋuviagilaurangne.

⁴ Igvit tâmnatsainak attannerivagit, Gûdîk; Jakokut ikajorneᴋartikit!

⁵ Illikut ômigijivut toggarlugit serᴋalitsomavavut; atterne tullerlugit serᴋomitsomavavut akkerartortivut.

⁶ Pittiksiga tattiksaringinapᴋo, saviksoaᴋotimalo ikajorungnangilânga;

⁷ Igville ikajorpaptigut ômigijiptingnit, kangusuktipâttillo illulugvigijivut.

⁸ Uvlut tamaita Gûde nertordlerutigijomavavut, attillo ᴋujagijomavavut issoᴋangitomut, Sêla.

⁹ Mânnale ajâktorpaptigut, kangusuktitauᴋolutalo, kattimgajoᴋotivullo aularᴋattigingilattit.

¹⁰ Utterᴋoᴋovaptigut ômigijipta sânginnit, arktaiᴋovlugit uvaptingnik illulugvigijivut.

¹¹ Saukatitut toᴋᴋotaksatitut îtipaptigut, siamartilutalo innuᴋattigêksuit akkorngenut.

¹² Inuᴋotitit niorvgotigivâttit akkeᴋangitomik, akkeᴋarᴋolungilattillo angijomik.

¹³ Kangusuktitaksangortipaptigut sillaliptingnut, mittautiksangortilutalo, allêkutiksangortilaptalo illumagijiptingnut.

¹⁴ Oᴋausiksangortipaptigut nallojut akkorngane, illeᴋettamarutiksangortilutalo innuᴋattigêksuit akkorngane.

¹⁵ Uvlok nâlugo mittautaunera samnêpok kênaralo ulliksimavok kangusungnermut.

¹⁶ Mittauteᴋartut, oᴋauteluktullo tussariaᴋarapkit, ômisuktullo, kiglugosuktullo takkojariaᴋarapkit.

¹⁷ Tamakkoa tamaita tikkisimavâtigut; puigorlungigalloaraptigit, nertornangitomiglonêt pinnialaungilagut angerutingne.

¹⁸ Omattivut allailungilat, arvertarnivullo sangulaungilat apᴋosinernit.

¹⁹ Taimak annaulerluta serᴋaligaptigut terrianiat akkorngane, ulliklutalo tâktomut.

²⁰ Gûdipta attinga puigorajalauruptigo, aggavullo ᴋongmuartinajalauruptigo Gûdemut takkorngartamut:

²¹ Gûdib tamanna nautsertorajangiᴋaûk? tâpsoma ômattib sagvangitôningit illitarigalloarmagit.

²² Pivlutille uvlok nâvlugo toᴋᴋotauvogut, inasugijaulutalo saukatitut toᴋᴋotaksatitut.

²³ Tuppaksarit Nâlegak, sôg sinniᴋît? Tuppalaurit ajâktormaringniaratigullo!

²⁴ Sôg kênait ijerᴋiuk puigorlutillo ᴋanoêniptingnik, tattijauniptingniglo?

²⁵ Tarnivut okkungangmatta sannermut, nâvullo nippingavut nunamut.

²⁶ Oppalungaijarit ikajortigut, piulilutalo, pitsiarnît pivlugo!