Imgerut 41 - Labrador Inuttitut Heritage Bible

Arusungnek ômisuktut annerpallijut pivlugit, illanârlo nallangaitok pivlugo. Tuksiarnek ikajortaujomamut Gûdemut.

Davidib imgerutâ imgerutigilugo.

¹ Pillorikpok ajoksartomik ikajorte; Nâlekab piuliniarpâ nalliunerluktome.

² Nâlekab sappumijarniarpâ innûᴋoniarlâlo, illinganitsiaᴋarᴋoniarlâlo nuname, igvillo tunniniangilat ômigijingita pijomajanginnut.

³ Nâlekab nakkoksitiniarpâ ᴋanimaningata inangaviane; igvit piulivat ᴋanimasinganit illunânit.

⁴ Uvanga oᴋarpunga: Nâlegak saimarvigilaunga; tarniga innulilauruk, illingnut idluitullilaurama.

⁵ Omigijima oᴋautigilukpânga akkerartorlunga: Kakkugo toᴋᴋoniarᴋâ attingalo nunguniarᴋâ?

⁶ Tikkitoᴋarangallo takkojartorlunga, tagva ômattinga oᴋarpok nallangainermik; kassênermik kattersuivok, annivok oᴋautigilâlo.

⁷ Omigijima illunatik issivsorᴋattigêgutigivânga akkerartorlunga, issumâlugutigivângalo.

⁸ Asserornermik nâvitsiviôvok (oᴋarput); nallavok makkitsungnainiarlunelo.

⁹ Illanârijamatauk tattigilauktama ᴋaᴋᴋôjaktorᴋattima ittikaminut tullerarpânga.

¹⁰ Igville Nâlegak saimarviginga makkitilungalo, tagva akkiniarpakka.

¹¹ Tamanna mallugosugutigivara ᴋuviagigamga, ômigijima igiaᴋomijarutiginiangimanga.

¹² Uvangale najumivarma idluitailinera pivlugo, pitilungalo kênavit sânganut issoᴋangitomut.

¹³ Nertortaule Nâlegak Israelib Gûdinga issoᴋangitomit issoᴋangitomut. Amen. Amen.