Imgerut 40 - Labrador Inuttitut Heritage Bible

Nallautainek Kristusib tunergutauninganik pijarellune.

Davidib imgerutâ imgerutigilugo.

¹ Nalegak nerriugilaukpara, tâpsomalo okkungavigivânga, tussalâlo ᴋêanera.

² ᴋellulaukpângalo ittersâlungmit asserornartomit, aᴋᴋilupiub maujanganit, ittiggakkalo pitipait ᴋairtomut, ablornikkalo nakkimarnijuitipait.

³ Imgerusertâmiglo tunnitsivigilaukpânga ᴋannimnut Gûdivut nertorlugo. Unnuktut tamanna takkojomârpât Nâlegarlo sivuragijomârpât nerriugilugolo.

⁴ Pillorikpok tâmna Nâlekamik sungertuteᴋartok, sâlungitorlo piôjorijunnut, saglonerniglo attorpaktunnut.

⁵ Nâlegak Gudîk tattamnartullinitit issumattillo saᴋᴋertattit uvaptingnut unnuktôvut; illiktut îtoᴋangilak: akpautigijomavakka, oᴋautigijomalugillo; kittiksaungilelle.

⁶ Tunnergutiksat toᴋᴋotaksat tunnergutiksallo nerᴋiksat kuvigagingilattit; siutimnigle angmaivigimavarma. Tunnergutiksat ôtaksat, tunnergutiksallonêt ajortoêrutiksat pijomangilattit.

⁷ Tagva uvanga oᴋalaukpunga: Ahâk aggerpunga aglait makperningene aglaksimavok uvamnik;

⁸ Pijomajat Gudiga piniarânérivara, malligaksauᴋojattillo ômattimnêput.

⁹ Idluarnek oᴋalautigijomavara illagêktoksoarne; kangasinâka epumertitsomangilâka, Nâlegak tamana nallungilat!

¹⁰ Idluarnît ijertorlungilara ômattimne; mikseᴋârnît piuliklernîllo oᴋautigivâka illagêktoksuit sângine.

¹¹ Igville Nâlegak napkiningnît noᴋᴋartitailiuk uvamnut; saimarveᴋarnivît mikseᴋârnivîllo sapputitsainarlinga.

¹² Anianerit kittiksaungitut illumangmanga; ajornima tigumavânga tautugungnarᴋonanga; tapᴋoa unnurnersauvut nutjanit niaᴋumnetunnit, ômattimalo ᴋemakpânga.

¹³ ᴋuviagiliuktôk Nâlegak piulivlunga; errinesugit Nâlegak ikajoromavlunga!

¹⁴ Kangusulerlît, kangusuktitaulerlîllo tarnimnik pinasuartut toᴋᴋotsomavlugo; kingorpiosarlutik niverlît nachonartungorlutik, ᴋannoênimnik annerpagijikka.

¹⁵ ᴋoaksârlît kangunarnermingne nipliajutigijikka: Takka, takka!

¹⁶ ᴋuviasuglît serrilîllo illingnik appertsuteᴋartut; piuliklernerniglo ivlersijut oᴋatsainarlît: Nâlegak angijomik nertortaule!

¹⁷ Uvangale akluvunga pattangalungalo, Nâlekable angajoᴋauvigivânga; igvit ikajortigivagit piulijigilutillo; Gudîk mulluniarnak!