Imgerut 39 - Labrador Inuttitut Heritage Bible

Kajusimanek ᴋenuêrsarlune nippangeromavlune, Tuksiarnek manigortaujomamut Gûdemut.

Davidib imgerutâ, imgerutigilugo Jedutunemut.

¹ Kajusimalaukpunga, apᴋosinikka udsertoromavakka, idluitullerᴋonnanga oᴋapkut. Kanera nippangertitsomavara, Gûdeᴋangitok sâmne takᴋojariakarapᴋo sulle.

² Nippangersimavunga innutôlungalo, niplingilungalo, ᴋanningitome pilloringnermit, kappiaktoadlarneralo uimajâdlarpok illumne.

³ Omattiga ônadlalerpok illumne, issumaksarsiortillungalo ikkoma ikkoalalerpok; tagva oᴋapkut oᴋalerpunga:

⁴ Ajochertorlaungatôk Nâlegak naggatiksamnik, ᴋannorlo inôtsima sivitôninganik, illitarksitilaunga sunamik ajoksarnimnik sulle.

⁵ Ahâk uvlukka, aggait igluinait sanimutôningititut îtipâttit, innôtsimalo nalliuninga sunaungitotun-îpok sângne; sunaungimariktotun Inuit ilunamatsiatik îput tagvane. Sêla.

⁶ Tachaktut kissiane innuk arvertarpok, sunaungitotuinak pivlugo perajarneᴋartitsivut; kattersuivut ᴋaujimanatiglo kia piginiarmangâgit.

⁷ Mânnalo Nâlegak sunamik nerriuktuksauvîk? Nerriungnera illingnêpok.

⁸ Piulilaunga ajornimnit tamainit, mittautiksauᴋoniarnangalo sillaitunnut!

⁹ Nippangerpunga, ᴋanneralo angmarlungilara; igvit pinialauravit tamattominga.

¹⁰ Pagvisarnît pêruk uvamnit, perlersimagama aggakpît pitlarningningennut.

¹¹ Igvit nalliat sugiarungne ajornerit pivlugit, tagva ânanauninga nungutaulerpok kettulapiktunnut sorlo. Ila sunaungimarikput Inuit ilunamatsiatik! Sêla.

¹² Nâlegak tuksiarnera tussalauruk, ᴋaigarsungneralo timerolauruk; niplingitailigit ᴋugvinimnut; ingergajôgama illingne, tujormijangôlungalo atâtagijaptut illunaititut.

¹³ Allangoanga, nakkoksilerᴋovlunga nûlerᴋârnanga îtsungnaiᴋârnangalo.