Imgerut 38 - Labrador Inuttitut Heritage Bible

Tuksiarnek ikajortaujomamut, piulijaujomamullo pitlartaunermit ômisuktunnillo.

Davidib imgerutâ erᴋaumanermut.

¹ Nalegak ningarlutit pitlarniarnanga, sugiarnangalo ᴋaningajarlutit.

² Karᴋjutit illumnêmatta, aggakpîllo aᴋᴋarvigimavânga.

³ Atsuilijoᴋangilak timimne ningarosungnît pivlugo, ullapirsauteᴋangilak saunimne ajornikka pivlugit.

⁴ Idluitullinima niaᴋora ᴋângagôrvigingmatsuk; nangmaktut oᴋumaitotut oᴋumaigidlalerpakka.

⁵ Ikkika tippelukput, marnearlutiglo sillainera pivlugo.

⁶ Pissukpunga kallangavlunga okkungadlarlungalo; uvlok nâvlugo arvertarpunga kiksarlunga.

⁷ Okpatikka pannidlarmaringmannik, atsuilijoᴋangilarlo timimne.

⁸ Nukkingêrotivunga toggarsimadlarlungalo. ᴋêavunga ômattima uimajâdlarninga pivlugo.

⁹ Nâlegak ᴋajungiutikka tamaita sângnêput, annersauminikka ijersimangilat sângne.

¹⁰ Omattiga sajukpok, nukkingma ᴋemaksimavânga; ijîngmalo ᴋaumaningak, tamannatauk uvamnêngilak.

¹¹ Nagliktama illanârijamalo oᴋumainera akkingerpât, illakkalo nangerput allivasiktome.

¹² Tarnimniglo pinnasuartut nigartorpânga; idluiveᴋaromajullo uvamnik, kassênermik oᴋauteᴋarput, attorpullo uivêriklernermik uvlut tamaita.

¹³ Uvangale tussangitotun îpunga, tussarlungilangalo; oᴋajuitotullo, ᴋannerminik angmailungitotut.

¹⁴ Tussangitotun îpunga, akkiorneᴋalungitotullo ᴋanermine.

¹⁵ Igvit Nâlegak nerriugigapkit; igvit Nâlegak Gudîk tussarniarpotit!

¹⁶ Uvanga oᴋarama: ᴋuviasuteᴋarᴋoniarnagit uvamnik! Ittiggakka majanganajarpatta, angijomik nertotinajarput akkerartorlunga.

¹⁷ Aniajuksaliortaumagama, ânianikkalo sâmnêtsainarput.

¹⁸ Idluitullinera kigligiutigigapᴋo; ajornikkalo sannikterijutigivakka.

¹⁹ Omigijikkalo inôvut pitsartolutiglo; pitjuteᴋaratiglo illuluktut uvamnik unnuktôvut.

²⁰ Idluitomiglo akkiniartut uvamnik ajungitomut, akkerartorpânga, tamanna pivlugo, ajunginek ivlerigapᴋo.

²¹ ᴋemaktaililaunga Nâlegâk; Gudîk ungasingniarnak uvamnit!

²² Errinesugit illilertoromavlunga, Nâlegak ikajortiga!