Imgerut 37 - Labrador Inuttitut Heritage Bible

Idluitullijut idluartullo akkilertauningit.

Davidib imgerutâ.

¹ Idluitut ningarutiginiarnagit pît, idluitullijullo annerutitailikit.

² Iviksukatitut nakkartausârniarmatta, perorsajutitullo tungojoktutitut ᴋunnulersârniarput.

³ Nâlegak tattigiuk ajungitullilutillo; nunamêtuarit, nertornarnermiglo serrijuteᴋarit!

⁴ Nâlegak ᴋuviasutigiuk; tâpsoma tunnitsiviginiarpâtit ômattivît tussugijanganik.

⁵ Apᴋotiksarnik Nâlekamut perᴋojilerit, nerriugilugolo, tâmna idluartomik illingatitsiniarpok.

⁶ Idluarnîllo saᴋᴋerniarpâ ᴋaumanertut sorlo, namaksinîllo uvlub ᴋetterarningatut sorlo.

⁷ Inilangalerit Nâlekame, uttakkilugolo. Ningarutigitailiuk tâmna uivênermine sullidlartok.

⁸ Ningarnek allaruk, ᴋaningarnerlo ipperaruk; ningarnak idluitullerᴋonak!

⁹ Idluitut pêjartauniarmatta, Nâlekamigle nerriuktut nuna kingormgutigijomârpât.

¹⁰ Killamiârsôvok sulle, tagva Gûdeᴋangitok îtsungnaipok; innigijangalo nautsertorniarungne, tagvanêtsungnainiarpok.

¹¹ Sinaungaitulle nunamik kingormgujiniarput, erᴋiêrtorneᴋarniarlutiglo ullapirsaume angijome.

¹² Gûdeᴋangitub idluartok issumaksarsiorutigiva akkerartoromavlugo, nierᴋolârutigivâ kigutiminut.

¹³ Nâlekable ijorivâ; takkogame uvlunga tikkiniarmat.

¹⁴ Gudeᴋangitut saviksoak amuarpât, pittiksitiglo ᴋellumivât, pattangajok aklujorlo ochotitsomavlugit, toᴋᴋotsomavlugillo arvertartut apᴋosinerne ajungitunne.

¹⁵ Saviksoangille ômattinginnut kibligutiniarput, pittiksingillo navingniarput.

¹⁶ Idluartub perᴋuteârsunga pigijanga namanersauvok Gûdeᴋangitut unnuktut perᴋutevaksoanginit.

¹⁷ Gûdeᴋangitut tallingit naviktauniarmatta; Nâlekable idluartut innôsavait.

¹⁸ Nâlekab idluitailijut uvlungit illitarivait, kingormgutijangillo îtsainaromârput issoᴋangitomut.

¹⁹ Kangusuktitauniangilat nalliunerlungme, ᴋâviksoaᴋartillugolo pearniarput namaktomik.

²⁰ Gûdeᴋangitut nungutaujomârmatta, Nâlekablo ômigijingit, naternaub tungojoktub ânanauningatut nungujomârput, sorlo isserluk nungusârmattut.

²¹ Gûdeᴋangitok akkiliksarsivok akkilênanelo, idluartorle nâpkigosukpok aitugolunelo.

²² Tâpsoma saimartitangita nuna kingormgutiniarmatsuk; ôminarnerartangille pêjartauniarput.

²³ Nâlekamut angutib taimaitub arvertarninga piganertitauvok, apᴋosininga ᴋuviasutigivâ.

²⁴ Pâlakune, tagva egitaulungilak, Nâlekab tigumingmago aggangittigut.

²⁵ Iunuôsuktôlaukpunga inutoᴋaulerlarmalo, takkolautsengilangalo sulle, idluartok ᴋemaktaulaungmat, kinguvângillonêt ᴋennujartoriaᴋalaungmatta nerᴋiᴋsannik.

²⁶ Uvlut tamaita pillitsivok attarksiakititsilunelo, kinguvângillo saimartisimavut.

²⁷ Idluinek ipperaruk ajungitullilutillo, innilangatsainarlutillo.

²⁸ Nâlekab idluarnek nagligingmago, ivsornaitoᴋotinelo ᴋemalungilait, issoᴋangitomut sapputijauvut; Gûdeᴋangitulle kinguvângit pêjartaujomârput.

²⁹ Idluartut nuna kingormgutivât, tagvanêtsainarlutiglo issoᴋangitomut.

³⁰ Idluartub ᴋaningata illissimanek oᴋarutigivâ, oᴋangatalo idluarnek ajochertutigivâ.

³¹ Gûdingata malligaksauᴋojangit ômattinganêput; ablorningit uniorksilungilat.

³² Gûdeᴋangitub idluartok uttakkivâ toᴋᴋoniarasugivâlo.

³³ Nâlekable tâpsoma agganginêtsainarᴋolungilâ; pitlaraksaunerarlungilâlo erᴋartortaukpât.

³⁴ Nâlegak nerriugiuk, apᴋosiningalo attutsainarlugo pît, tagva kagvertiniarpâtit, nunamik kingormgujerᴋovlutit; takkojomârpotit Gûdeᴋangitut pêjartauninginnik.

³⁵ Gûdeᴋangitut illangât takkolaukpara; tâmna tattitosartôlaukpok, siamarterlunelo, tungajoksilunelo nappârtotut, nunamine nangminerijaminêtotut;

³⁶ Sanarᴋutaugamele, ahâk tagvanêtsungnailaukpok; apperᴋutigilaukpara, nanelonêlle nachvârtaulaungilak.

³⁷ Idluitailijok ᴋemergoleruk, nertornartorlo takkonaruk; taimaitok kingorlermik pilloridlaromârmat.

³⁸ Tappajulle nungutaujomârput attautsekut; Gûdeᴋangitullo kingorlermik pêjartaujomârput.

³⁹ Idluartullo tikkitauvut ikajornermut Nâlekamit; tâmna kappianartome pitsartutigivât.

⁴⁰ Nâlekablo illiginiarpait piuliniarlugillo, Gûdeᴋangitunnit piuliniarpait, ikajorniarlaitalo tattigingmatsuk.