Imgerut 36 - Labrador Inuttitut Heritage Bible

Arusutiksak Gûdeᴋangitut pivlugit. Nertordlernek Gûdib pitsiarninganik idluartunnut.

Davidib Nâlekab kivgangata imgerutâ imgerutigilugo.

¹ Omattimne oᴋausiksaᴋarpok Gûdeᴋangitub illusinginnik; sivuranealungilak Gûdemik ijikita sângangne.

² Ingminik ijingmine nertortingmat, idluitullinerminik attoromavlune ômisugomavlunelo.

³ ᴋaningata oᴋausingit ᴋannoêtôvut, uivêriklerniôlutiglo; sillatojungnairpok, ajungitullijungnairlunelo.

⁴ ᴋannoênek issumaksarsiorutigivâ inangavingmine; soᴋᴋosijuidlune nangerpok apᴋutiâlungme, idluitomiglo sunamiglonêt ulloreasulungilak.

⁵ Nâlegâk pitsiarnît ᴋillangmut tôrpok, mikseᴋârnîllo nuvujat tikkiningit tikkidlugit pivok.

⁶ Idluarnît Gûdib ᴋaᴋᴋangititut îpok, idluarsainitillo ingergarnertut angijoksoatut îput. Nâlegak igvit ikajorpotit tamangnik; innungnik, ômajuniglo.

⁷ Pitsiarnît ila ivlernartoksôvok Gude, Inuit ᴋittorngangit esarokpît tachaliningane inilangangmatta!

⁸ Nâmaksititauvut iglovît perᴋutsaringninginnut akluinartunnut; immerpattillo iklinartoᴋotivît kôksoanganut.

⁹ Inôtsib puailavinga illingnêmat; ᴋaumasernelo ᴋaumasek takkovavut.

¹⁰ Pitsiarnît piganerle tâpkonunga illitarksijunnut illingnik, idluarnîllo idluitailijut ômattinginnut.

¹¹ Piojorijunnut tullerartauᴋoniarnanga, Gûdeᴋangitullo aggangita ochotiniarnanga.

¹² Tagvane idluitullijut ochovut, nallalutiglo ochotisimavlutik, makkitsungnangimatta.