Imgerut 35 - Labrador Inuttitut Heritage Bible

Tuksiarnek piulijaujomamut ômisuktunnit mittautelingnit.

Davidib imgerutâ.

¹ Nalegak akkerartortikka akkerartorkit; sorsuktikka sorsukit.

² Sappulutak, sakkutillo tigukit, oppalungairlutillo ikajoromavlunga.

³ Kallugiak aksorotiuk, apᴋosinerlo pallangairuk unangmijimnit. Tarnimnut oᴋarit: Ikajortigivarma.

⁴ Sillasiortitaulit mittautaulîllo unangmiklertut tarnimnik; uttertitaulît kangusuktitaulîllo ᴋanoênimnik issumaksarsioruteᴋartut.

⁵ Sanniktitut, annoremut tiktaumajutitut îlerlit, Nâlekablo Engelingata ajâktorligit!

⁶ Apᴋotinget tâktôlerle ᴋoaitarnalerlelo, Nâlekablo Engelingata unangmiligit!

⁷ Pitjuteᴋaratik angigutsivlutik nulluaᴋotimingnik ningititsivigilaungmanga, asseroromavlunga, pitjuteᴋaratiglo tarniga ittersalliorutigilaukpât.

⁸ Taimaitok, asseroinerub opingârliuk tagvainak, nulluaᴋotimelo ningitilauktame nulluartiliuk, asserornartomullo ijukarle.

⁹ Tagva tarnima Nâlegak ᴋuviasutiginiarpâ, serridlarniarlunelo ikajorninga pivlugo.

¹⁰ Saunikka illunatik oᴋartuksauvut: Nâlegâk, kia adsigivâtît? ajulertomik piuliklertotit tâpsomangat pitsartuluartomit tâpsomunga, pattangajorlo aklujorlo arktartinginnit.

¹¹ Tikkitoᴋalerpok passiklertunnik saglojunnik; passivânga ᴋaujimangitamnik.

¹² Idluitomik akkiniarpânga ajungitomut, tarniga illiârsuᴋojomavlugo.

¹³ Uvangale ᴋanimalaurangatta annorângmik pôksaijamik attilaukpunga, oᴋumaitilungalo nerritailinermut, tuksiatsainalauktungalo illungertorlunga.

¹⁴ Illuseᴋalaukpunga illanârinajarupko, ᴋattangutiginajarupkolonêt sorlo; kiksarlunga okkungavlunga arvertarlaukpunga, taimaitotut anânaminik kiksaruteᴋartotut.

¹⁵ Tâpkoale ᴋannoêtoᴋarnera ᴋuviasutigivât pikabladlarlutiglo kattingalerput; akkerartoromavlunga egissimajut kattingalerput illitarilaungitakka; aksorotjivut noᴋarlungilello.

¹⁶ Taipkoa takkomortut mittauteᴋartullo natjak pivlugik illagilugit, kigutitik kêtipait pivlunga.

¹⁷ Nâlegâk, ᴋannok sivitutigijomik takkonâromavît? Tarniga piulilauruktôk pêrajaludlarnermit tamattomangat, petuara Loeviarᴋennit!

¹⁸ ᴋujagijomavagit illagêktoksoarne; innugasaksuit akkorngane nertoromavagit.

¹⁹ ᴋuviasuᴋoniarnagit pivlunga, sullinatik ômigijikka; ijinginnullo allêkutekarkoniarnagillo uvamnik, pitjuteᴋaratik ômisuktut uvamnik.

²⁰ ᴋanoêtoᴋartitsinasuarmatta, patsitiksarsiorlutiglo taimângolungitunnik sinaungaitunnut nuname;

²¹ ᴋannermingnullo aitadlarvigivânga, oᴋarlutiglo: Takka, takka! tamanna takkoranerivavut!

²² Igvit Nâlegak takkovet, niplinginiarnak! Nâlegak ungasingniarnangatôk.

²³ Tuppaksarit, tuppaklutillo idluarᴋutiksamnut, illuserijaralo pivlugo, Gûdiga Nâlegaralo!

²⁴ Erᴋartunga idluarnît malliklugo Nâlegak Gudîk, ᴋuviasutiksaᴋarᴋonagit uvamnik.

²⁵ Oᴋartailitikit ômattingine: Takka, takka! tamattominga pijomalaukpogut. Oᴋarᴋoniarnagit: Emavavut.

²⁶ Kangusulerlît, kangusuktitaulillo illunaita ᴋanoênimnik ᴋuviasuteᴋartut; kangusuktitaunermik kangunartomiglo anorartitaulît angutauservigijikka!

²⁷ Opigosuglît, ᴋuviasulerlîllo idluarnimnik naglingniktut; oᴋatsainarlît: Nâlegak nertortaudlarle kivgaminik ikatsoriktok.

²⁸ Oᴋamalo idluarnît oᴋautigijaksariva, nakorijaksarivâtillo uvlut tamaita.