Imgerut 34 - Labrador Inuttitut Heritage Bible

ᴋajungersainek Gûde nertorlugo sivuragilugolo.

Davidib imgerutâ, issumaminik pissertorame Abimelechib sângane, aularᴋojijub tâpsominga, aularamelo.

¹ Nalegak nakorijomavara nalliutunne tamaine, nertortauninga ᴋanimnêtsainartuksauvok sorairane.

² Tarnima Nâlegak nertortigijaksarivâ, ᴋennuᴋaijuitut tussarᴋovlugit tamattominga, ᴋuviasuᴋovlugillo.

³ Illagilunga Nâlegak nakorissiuk, illagêklutalo attinga angijorortilavut!

⁴ Nâlegak ᴋennilaurapᴋo, tagva kiolaukpânga, piulilungalo kappiasungnimnit tamainit.

⁵ Kenâjut tâpsominga aijullo tâpsomunga, ᴋaumaksartauvut kênangillo aupallerniangilat.

⁶ Ajulertok una niplialauktillugo, Nâlegak tussalaukpok, ikajorlâlo ᴋannoêninginnit tamainit.

⁷ Nâlekab Engelingata sivôragijine illumavait, ikajorlaitalo.

⁸ Ikpigileritse takkoluselo ᴋannok Nâlegak illannâᴋarmat! Pillorikpok tatteᴋartok tâpsominga!

⁹ Nâlegak sivôragissiuk illipse ivsornaiᴋutaujose tâpsomunga; sivôrajut tâpsominga ajoksalungimatta.

¹⁰ Loeviarᴋat ajoksariaᴋarput, ᴋâdlariaᴋarlutiglo; Nâlekamigle ᴋennertut ajoksalungilât perᴋutinnik sunatuinarnik.

¹¹ ᴋaititse ᴋittorngaujose tamaunga, tussanârissinga, sivôranermik Nâlekamik ajochertoromavapse.

¹² Kina inôtsiarnermik tussuvâ, uvloᴋaromalunelo ajungitunnik?

¹³ Oᴋait sapputiuk idluitomit, kangasinâᴋiglo, nallâgôngitomik oᴋarᴋonagik.

¹⁴ Idluinek allaruk, ajungitullilutillo; ullapirsaumik ᴋenneruk unangmilugolo.

¹⁵ Nâlekab ijikita idluartut kamagivait, siutikitaklo nipliadlarningit.

¹⁶ Nâlekable kênangata idluitullijut akkingerpait erᴋaumajauninginnik pêjairᴋovlugo nunamit.

¹⁷ Ipkoa (idluartut) nipliaraikpatta, tagva Nâlegak tussarpok, piulilugillo ᴋanoêninginnit tamainit.

¹⁸ Nâlegak ᴋannipok serᴋomisimajunnik ômattelingnut, ikajorpaillo issumamikut kappiasuktut.

¹⁹ Idluartok kappiagijaᴋarpok unnuktunnik, Nâlekable ikajorpâ tamakkonangat tamainit.

²⁰ Sauningit illunaita sapputivait, tâpkoa illangâllonêt serᴋomitauᴋonago.

²¹ ᴋanoênerub Gûdeᴋangitok toᴋᴋoniarpâ, idluartomiglo ômisuktut, passijaksauniarput.

²² Nâlekab kivgame tarningit piulivait; illunatiglo tatteᴋartut tâpsominga passijaksauniangilat.