Imgerut 33 - Labrador Inuttitut Heritage Bible

Idluartitaumajut nertordlerningat Gûdemik.

¹ ᴋuviasudlaritse Nâlekame idluartose; idluitailijut nertutsiaraksarivât.

² Nâlegak ᴋujagissiuk Harfesijarluse; nipliajorvigissiuk Psalterinnut noᴋakseralingnut tallimaujortunnik.

³ Imgervigissiuk imgerusertâmik; namaktomik pinniarsiuk noakseralingnut, angijomik nippelingmut.

⁴ Nâlekab oᴋausingit mikseᴋârtôngmatta, angersimaninelo nallautsititsainarpait.

⁵ Idluarnek idluarsainerlo namagivak; nuna nâmavok Nâlekab pitsiarninganik.

⁶ ᴋillait Nâlekab oᴋausinginut pingortitauvut, tamaitalo kattimgajoᴋotingit tâpsoma ᴋaningata annerninganut.

⁷ Immarbiub imaksoangit kattersorpait attautsemut sorlo, pivianartotaliᴋotiminut malliksuit pitipait.

⁸ Sillaksoarmiut illunatik Nâlegak sivuragilitsuk, tâmnalo ilunamatsiatik nuname nunaᴋartut illeragilitsuk.

⁹ Tâmnale sumik oᴋarpât taimailerpok tâva; perᴋojikpat innerpok tâva.

¹⁰ Nâlekab nallojut ᴋajusimaningit asserorpait, innuᴋattigêksuillo issumangit sangutipait.

¹¹ Nâlekable ᴋajusimaninga issoᴋangitomêtuatsainarpok, ômattingatalo issumangit soraijuitsainarput.

¹² Pilloridlarput innuᴋattigêksuit Nâlekamik Gûdeᴋartut; innuᴋattigêksuit tâpsoma annerimajangit kingorngutijaminut.

¹³ Nâlegak kenâvok ᴋillangmit, tautukpaillo inuit ilunamatsiatik ᴋittorngangit;

¹⁴ Iksivautaksoaminit aulajuitomit illunaita takkonârpait, nuname nunaᴋartut.

¹⁵ Tâpsoma illunatik ômattingit sannavait, pinniarningit ilunamatsiatik kamagivait.

¹⁶ Attanniub pitsartunersoarne ikajortigingila; innuk sôngojok piulijaulungilak pitsartunersoanganut.

¹⁷ Horsit ikajorniôlungilattauk sullitsiartomik, sôngonersoamingnullo piuliklerlungilat.

¹⁸ Ahâk, Nâlekab ijingata sivuragijine takkonârpait, pitsiarninganik nerriuktut.

¹⁹ Tarningit piulilugit toᴋᴋomit perᴋovlugo, nerritilugillo ᴋâksoaᴋartillugo.

²⁰ Tarnipta Nâlegak nerriugivât, tâmna ikajortigivavut, sappulutarilugolo.

²¹ Omattipta ᴋuviasutigingmatsuk, attingalo ajungitok tattigivavut.

²² Pitsiarnivît, Nâlegak, ᴋollangiarlittigut sorairane, sorlo nerriugigaptigit.