Imgerut 31 - Labrador Inuttitut Heritage Bible

Tuksiarnek illinganerme ᴋanoêtome, nertordlernerlo ikajortaunek pivlugo.

Davidib imgerutâ imgerutigilugo.

¹ Nalegak igvit tattigivagit, kangusuktitauᴋoniarnanga issoᴋangitomut; piulilaunga idluarnernut!

² Siutit maniguk uvamnut, ikajorsâlaunga; ᴋairtôlaurit sôngojok uvamnut, torᴋorviksaᴋautaulutillo, ikajorᴋovlutit uvamnik.

³ ᴋairtorigapkit torᴋorviksaᴋautigilutillo, attîllo pivlugo aulatiniarparma tassiorniarlungalo.

⁴ Nussungniarparma nullutjanit, taipkoa ningitilauktanginit pivlunga; igvit pitsartutigigapkit.

⁵ Aggangnut annernera perᴋovara; igvit piulilaukparma Nâlegak nertornartôjotit Gûde!

⁶ Omigivakka saglonernik tangeᴋangitunik ivlersijut uvangale Nâlegak tattigivara.

⁷ Arᴋiêrtorpunga ᴋuviasuklungalo pitsiarnit pivlugo, pattanganera tautugangne, kamagigangnelo tarniga siorniortillugo.

⁸ Unertutiginangalo ômisuktub agganginnut, ittiggakkalo pitipâttit initojomut.

⁹ Nâlegâk napkigilaunga, ᴋâppiasudlarama; ijiga perlerpok kiksarnermut, taimâktauk tarnigalo timigalo.

¹⁰ Inôsera illangersimangmat kiksarnermut, Jârikkalo annersauminernut; nukkingerotivunga idluitullinimnut, saunikkalo perlersimavut.

¹¹ Siorniortitimnut mittautiksangorsimavunga sillalimnuttauk, makkojungnarsilungalo illamnut; takkojut uvamnik apᴋosinerme iglut akkorngane ᴋemâvânga.

¹² Puigortaumavunga toᴋᴋungajotut; illulerkutitut serᴋomisimajotut-îlersimavunga.

¹³ Tussarama unnuktut mangatsininginik, sivôranek illunanêpok avatimne; ᴋachimioᴋattigêlerput pivlunga, issumaksarsiorlutiglo, inosêrotitsomavlunga.

¹⁴ Uvangale igvit Nâlegâk, tattigivagit, oᴋarlungalo: Gudigivagit;

¹⁵ Nalliunera aggangnêpok. Piulinga ômigijima agganginnit, tâpᴋonangallo unangmiklertunnit uvamnik!

¹⁶ Kênavit kivgait ᴋaumaksarliuk; iᴋajulaunga pitsiarnernut!

¹⁷ Nâlegâk, kangusuktitauᴋoniarnanga nipliavigigapkit; Gûdeᴋangitut kangusuktitaujariaᴋarput, oᴋausiksêrotitaujuksaulutiglo kappianartovingmut.

¹⁸ Kannît nallangaitut nippangertuksauvut, iktoriktaidlutik pimariuterlutiglo mittauteᴋarlutiglo idluartok akkerartorlugo oᴋauseᴋartut.

¹⁹ Ila angijoksôvok pitsiarnît, ijertet sivôrajut illingnik, pivlugit saᴋᴋertello tatteᴋartunut illingnik, Inuit ᴋittorngangita takkoane!

²⁰ Igvit ijertorpâttit sagvangitome illingne, Inuit aklunânginnit, ullikpâttit tupperme oᴋannit aivagosuktunnit.

²¹ Nâlegak nertortaule pitsiarnine tattamnartok saᴋᴋertilaungmago uvamnut iglugasaksoarne sôngojunne.

²² Uvangale mungudlarlunga oᴋalauktunga: Ijikpît sângangnit nussuktaumavunga; sullele ᴋennunima nippinga tussarlaukpat ᴋaigarsudlartillunga illingnut.

²³ Nâlegak nagligissiuk ivsornaitoᴋutaujose tâpsomunga illunase! Nâlekab okpertut sapputivait, nâmaktomiglo akkiniarpâ piojorinermik attortok.

²⁴ Maksoatitse, tâpsomalo ômattisse nakkoksiligit, illunase Nâlekamik nerriuktose.