Imgerut 30 - Labrador Inuttitut Heritage Bible

Piulimajub ᴋujaliningata imgerutinga.

Davidib imgerutâ, attortaujok iglotâminut ittertainarame.

¹ Nakorivagit Nâlegâk, igvit angijorortilunga ᴋellulauramga, ômigijikkalo ᴋuviasuᴋolungilattit pivlunga.

² Nâlegak Gûdiga, ᴋaigarsuktillunga illingnut, pijungnaitilaukparma.

³ Nâlegak igvit tarniga tassiulaukpet kappianartovingmit; innôᴋolaukparma tâpᴋonangat ittersamut ijukartunnit.

⁴ Nertordlerluse Nâlegak imgervigissiuk illipse ivsornaitoᴋutaujose tâpsomunga; nakorissiuglo opinarninga ivsornaidlartok.

⁵ Ningarninga ijib sikkungilarningatut attautsetut annikitigijôngmat, inûtsiarningale innôtsib sivitôningatut akkunertigijôvok; unnungme ᴋugviorneᴋarpok, uvlârmele ᴋuviasungneᴋarpok.

⁶ Uvangale ᴋanoêngitsiarlunga issumalaukpunga: Aulaniatsangilanga.

⁷ Nâlegak nâmagijarnut ᴋaᴋᴋaᴋotiga sôngotilaukpat: kissiane kênait ijilaurangne uvamnit, ᴋoaᴋsâlaukpunga.

⁸ Illingnut Nâlegak, nipliavunga, Nâlegak ᴋenuvigivara:

⁹ “Auga suksauva, asserornartomut ijukaruma? Sannit ᴋujaginiarolloarpâtît nertornarnillo oᴋautigilugo?”

¹⁰ “Tussalaurit Nâlegâk, saimarvigilungalo; Nâlegâk ikajorteôlaurit uvamnik!”

¹¹ Tagva ârusungnera ablatsângortilaukpat okigêsernermut, annorâka pôksaijangojut pêjarpâttit uvamnit, tapserusijuteᴋartilungalo ᴋuviasungnermik;

¹² Opigosungnera nertordlerlune imgervigilutit perᴋovlugo, nippangerᴋonagolo. Nâlegak Gûdiga, ᴋujagijomavagit issoᴋangitomut.