Imgerut 28 - Labrador Inuttitut Heritage Bible

Attaniub tuksiutjininga innuᴋotiminik idluartunik.

Davidib imgerutâ.

¹ Niplialerangama illingnut Nâlegâk, ᴋairtorijara, tagva niplertailiviginiarnanga; taipᴋotitunak îlerᴋonanga, niplervigingikumga, ittersâlungmut ijuᴋartutitut.

² ᴋennunima nippinga tussaruk, ᴋaigarsugvigigupkit, aggakka ᴋongmuartileraigupkit ivsornaitoveᴋotingnut takkamanênerpâmut.

³ Nussuᴋassiutiniarnanga Gûdeᴋangitut illagilugit, idluitullijullo, illanârnartunnik oᴋauseᴋartut inuᴋattimingnut, idluitomiglo ômamiutiggit.

⁴ Tunnitsivigikit pinniarningit illusiâlungillo malliklugit; aggangita pinniarningit malliklugit tunnitsivigikit; akkiniarvigikit, sorlo sannaningit iᴋajuseᴋariaᴋarmatta.

⁵ Kamajomangimatta Nâlekab pinniarninginik, aggangita sullijanginiglonêt; tamanna pivlugo serᴋomitsomârpait, âᴋiniarnagillo.

⁶ Nâlegak nertortaule ᴋennunima nippinga tussarmago.

⁷ Nâlegak pitsartutigivara, sappulutarilugolo; ômattima tâmna tattigiva, ikajortaumalungalo; ômattigalo ᴋuviasukpok; kutsaservigijomavaralo imgerumut.

⁸ Nâlegak pitsartutigivât; pitsartuniôvok mingoartanganik ikajortok.

⁹ Innugaksoaᴋotitit ikajorkit, kingormgutijatillo pitsartutilaukit pairilugillo, ᴋagvertilugillo issoᴋangitomut.