Imgerut 27 - Labrador Inuttitut Heritage Bible

Kajungersartaunek ᴋuviasungnermut Nâlekamik tatteᴋarnermullo tâpsominga.

Davidib imgerutâ.

¹ Nalegak ᴋaumanerivara piulijaunerilugolo, kina erksigijaksarivigô? Inôtsima Nâlegak pitsartutigivâ, kina ᴋêungomivigijaksarivigô?

² Idluitut akkerartortima, ômigijimalo pinasuarumga, uviniga nerrijomavlugo, apportuksauvut ochojuksaulutiglo.

³ Kattimgajoksuit akkerartorlunga tikkigalloarpanga, tagva ômattiga erksilungilak; unatadlartoᴋalerangat akkerartorlunga, tagva tamattomane maksoavunga.

⁴ Attausek ᴋennuarivara Nâlekamit, pijomadlartara; Nâlekab iglunganêtsainarungnarᴋovlunga, Nâlekab innerᴋonarninga tautuklugo, Tempeleᴋotingalo ᴋemergolugo.

⁵ Tâpsoma serngnigingmanga iglomine nalliunerluktome, ijerpângalo tuppingmine, ᴋagvertipângalo ᴋairtub ᴋânganut.

⁶ Mânnalo niaᴋungma ômigijikka illumajikka ᴋagvervigivait, tunnergutiniglo nertordlerutiksennik tunnijijomavunga tuppingne, Nâlegak imgervigijomavara nipliajorvigijomalugolo.

⁷ Nâlegâk, nippiga tussaruk, nipliaraiguma; saimarviginga tussarlungalo.

⁸ Omattima oᴋausernik erᴋaitipâtit: Kênara ᴋenneraksarivasse. Tamanna pivlugo uvangatauk, Nâlegâk kênait, ᴋennerpara.

⁹ Kênait ijertaililugo pît uvamnit; ningarlutillo kivgait ajâktorniarnago; ikajortigigapkit. Ipperarniarnanga, aggaktillo pêrniarnagit uvamnit, Gûde piulijiksarijara!

¹⁰ Atâtama, anânamalo ᴋemalaungmanga, Nâlekable illaliorpânga.

¹¹ Nâlegâk, apᴋosinernik unertutilaunga, tassiorlungalo apᴋosinerme tammarnangitome, akkerartortikka pivlugit.

¹² Tunnitaililaunga ômigijima pijomajanginnut; passiklertokalermat saglojunnik akkerartorlunga, annerterijuniglo pinniarlungnernik.

¹³ Okperalloarpungale sulle, takkoniarama Nâlekab ajungitullininginnik inôjut nunangane.

¹⁴ Nâlegak nerriugiuk; maksoalerit, tâpsomalo ômattit pitsartutiliuk, Nâlegarlo nerriugiuk.