Imgerut 26 - Labrador Inuttitut Heritage Bible

Tuksiarnek passijaksaunginek sâlaᴋarᴋojomavlugo.

Davidib imgerutâ.

¹ Nalegak, idluartomik saᴋᴋêvigilaunga, arvertarlaurama passijaksaunanga. Nâlegak tattigivara, tamanna pivlugo aulaniangilanga.

² Kiglissinialaunga Nâlegâk, ôktorlungalo; taktûkka ômattigalo illaᴋarungnaitikit.

³ Saimarveᴋarnît ijingma sângangnêmat, arvertarpungalo mikseᴋârnerne.

⁴ Inuit nallangaitut iksivaᴋattigilungilakka, illagêngneᴋarnangalo angêjijunnik.

⁵ Kassêtut kattimaniksangit ômigivakka, Gûdeᴋangitullo iksivaᴋattigingilakka.

⁶ Aggakka ubvarpakka passijaksaunginerme; Altareᴋotillo, Nâlegâk, ungagivara;

⁷ Tussartauᴋovlugo ᴋujalinerub nippinga, tattamnartullinitillo tamaita unipkautigilugit.

⁸ Nâlegak iglovit ininga ivlerivara, innelo opinarnivît najugâ.

⁹ Tarniga idluitullijut illagilugit pêjarᴋassiutiniarnago, innôseralonêt aungmik pinasuartut illagilugit.

¹⁰ Illusiâlungnik attorpaktut, aggamingniglo tattataukojijut pilliusianik.

¹¹ Uvangale arvertarpunga passijaksaunginimne. Piulilaunga saimarvigilungalo!

¹² Ittigakka nangerput apᴋosinerme manniktome. Nâlegak nertoromavara kattimaniksanne.