Imgerut 25 - Labrador Inuttitut Heritage Bible

Kêmitingnek ajochertortaunermik nâpkigijaunermiglo Gûdemut.

Davidib imgerutâ.

¹ Igvit Nâlegak ᴋillanârivagit.

² Gûdîk tattigivagit! Kangusuktitauᴋoniarnanga, ômigijikka ᴋuviasuteᴋarᴋonagit uvamnik.

³ Illunatik illingnik nerriuktut kangusuktitaungimatta, kangusuktitaujariaᴋarpulle pitjuteᴋaratik nertornangitomik piniartut.

⁴ Nâlegâk, apᴋosinernik unertutilaunga, apᴋotingniglo ajochertorlaunga!

⁵ Tassiunga mikseᴋârnerne, ajochertorlungalo; igvit Gûdiôgavit tâmna, ikajorte uvamnik; uvlut tamaita nerriugivagit.

⁶ Nâlegak nâpkoarnît, pitsiarnîllo erᴋaumakik, issoᴋangitomit pingmanik.

⁷ Inuosungnima idluitulliningit, tappanikkalo issumagitailikit; nâpkiningnîlle malliklugo issumagilaunga, pitsiarnît pivlugo.

⁸ Nâlegak ajungitôvok, idluitailijôlunelo, tamanna pivlugo ajortuggit ajochertorpait apᴋosinerme.

⁹ Pattangajut tassiorpait namaktomik, ajochertorpaillo pattangajut apᴋosinerminik.

¹⁰ Nâlekab apᴋosiningit pitsiarniotuinarput, mikseᴋârniôtuinarlutiglo, tapkonunga angerninganik kigligiudsininginniglo nâlaktunnut.

¹¹ Attit pivlugo Nâlegak namangitullinikka unnuktoksôjut saimarvigikit.

¹² Kinauva tâmna Nalekamik sivôrajok? Tâpsoma unertutiniarpâ apᴋosinermik idluarnerpâmik, annerijaksarijanganik.

¹³ Tarninga ajungitome ineᴋarniarpok, kinguvângitalo nuna pigijomârpât.

¹⁴ Nâlekab illanâᴋarninga tâpᴋonanêpok sivôrajunne tâpsominga, angernerminiglo ᴋaujitipait.

¹⁵ Ijingma Nâlegak takkonâtsainarpâk, tâpsoma ittiggakka nussungniarmagit nullutjennit.

¹⁶ Sâviginga nâpkigilungalo; inutôgama pattangalungalo.

¹⁷ Omattima kappiasungninga angijôvok; nussulaunga ᴋannoênimnit!

¹⁸ Kappiaktoadlarnera pattanganeralo takkonârkik, issumagijungnaivigilungalo ajornimnit illunainit.

¹⁹ Takkolerit ômigijikka unnuktôngmatta, ômigilungalo uivêmut.

²⁰ Tarniga udsertoruk, piulilungalo; kangusuktitauᴋoniarnanga tattigigapkit.

²¹ Passijaksaunginerub idluarnerublo sapputilinga; nerriugigapkit.

²² Gûde, Israele piulilauruk ᴋannoêninginnit tamainit.