Imgerut 24 - Labrador Inuttitut Heritage Bible

Attanniub nâlengnartub nâlegauvinga, kivgangillo itterningalo.

Davidib imgerutâ.

¹ Nalekab nuna pingillo pigivait; nunaksoak, nunaᴋartullo tâpsomane.

² Tâpsoma imarbiksuit ᴋânginut tunganektalaungmago, ingerganerillo ᴋânginnut atsungilaukpa.

³ Kina Nâlekab ᴋaᴋᴋanganut ainiarᴋâ? Kinalo nangitsainaromârᴋâ tâpsoma inningane ivsornaitomê?

⁴ Passijaksaungitunnik aggalik, ivsornaitomiglo ômattelik; illusilungnik ᴋuviasuteᴋangitok, angilulungitorlo.

⁵ Tâmna pitsartutitaunermik Nâlekamit piniarpok, idluarnermiglo piulijauningata Gudinganit.

⁶ Tamadsa kinguvârêt tâpsominga apperᴋuteᴋartut; ᴋennertut kênarnik, Jakokunit, Sêla.

⁷ Upkoaksuit nerrotosigik, upkoello sillaksoarme pôktosisigik, attannek nâlengnartok itterᴋovlugo!

⁸ Kinauva attannek nâlengnartok taimna? Nâlegauvok pitsartujok sôngolunelo, Nâlegak sôngojok sorsungnerme.

⁹ Upᴋoaksuit nerrotosigik, upkoello sillaksoarme poktosisigik, attannek nâlengnartok itterᴋovlugo.

¹⁰ Kinauva attannek nâlengnartok taimna? Tagva Nâlegak Zebaot, tâmna attanniôvok nâlengnartok! Sêla.