Imgerut 22 - Labrador Inuttitut Heritage Bible

Kristusib ânianginik ânanauninganiglo.

Davidib imgerutâ, tuktu imgerutigilugo, uvlâkut pinasuartaujok.

¹ Gûdîk, Gûdîk, sôg ᴋemakpingâ? Ungasikpotit ikajortaunimnit, ârusungnimalo oᴋausinginnit.

² Gûdîk uvlôtillugo nipliadlarpunga, tagva kiolungilattit; unnuangotillugolo nippangerlunginivunga.

³ Igville hailigeôvotit, innerᴋarlutillo Israelitit nertordlerninginne.

⁴ Atâtagijapta tattigilaukpâtit, tatteᴋartillugillo ikajorlaukpâttit.

⁵ Illingnut ᴋaigarsulaukput, piulijaulutiglo; tattigivâtit kangusuktitaunatiglo.

⁶ Uvangale pâmgortôvunga, inônangalo, mittautiksauvunga innungnut, nachogijaksaulungalo innugasaksoarnut.

⁷ Illunatik takkojut uvamnik mittautigivânga; kanermingnik aitarput, illeᴋettamarlutiglo:

⁸ Illinganine ârusutigiliuk Nâlekamut, tâpsoma ikajorliuk, piulilugolo, ᴋuviagikpago.

⁹ Ila igvit anânama timinganit nussulaukparma, sungertutigilaukpagit anânama iviangigingnêlaulunga sulle.

¹⁰ Illingnut pititaulaukpunga anânama timinganit; igvit Gûdigivagit anânama timinganit.

¹¹ Ungasingniarnak uvamnit, kappiasungnek ᴋannidlarmat; mâne ikajortiksaᴋalungimat.

¹² Tuktuvait parngnît unnuktut illumavânga, angusalloâluit ᴋoinijut avatimnêput.

¹³ Kanersoarmingnik aitarvigivânga, Loevetut ᴋallingoartotut kêsuktoksoatullo.

¹⁴ Kovijaumavunga imektut, avatikka illunatik uniortiput; ômâttiga timimne igupsaujârtut orksungita tangingatut aulersimajotut îpok.

¹⁵ Nukkika pannersimavut machavinertut sorlo, oᴋaralo nippipok ᴋillamnut; igvillo illivarma toᴋᴋub sanninginnut.

¹⁶ Kingmit illumangmanga; idluitoâluit, pikablajoksuit avatimnôrsimavut; aggakka ittiggakkalo puttorpait.

¹⁷ Saunikka illunaita kittipakka; tâpkoale takkonârput, ᴋuviasutigivângalo.

¹⁸ Anorâka avikpait ingmingnut, ulligalo immerautigivât.

¹⁹ Igville Nâlegak ungasingniarnak; pitsartutiga errinesugit ikajoromavlunga!

²⁰ Tarniga piulilauruk saviksoarmit, pituara kingminit!

²¹ Iᴋajunga Loevib torkluanit, piulilungalo tuktuvâluit nakjunginnit.

²² Attit unipkautigijomavara ᴋattangutimnut, illagêktunnelo nertoromavagit.

²³ Nâlegak nakorissiuk sivurajose tâpsominga; Jakob kinguvângita illunatik opigilitsuk, Israeliblo kinguvângita illunatik illeragilitsuk!

²⁴ Tâpsoma aklujub pattanganinga nochogilaungimago, allangoarnagolonêt; kênanelo ijilaungilâ tâpsomangat, ᴋaigarsugvigingmagolo tussalaukpâ.

²⁵ Nertordlernera illagêksoarne illingnit pivok. Angersimanikka nallautsititsomavakka, sivôrajut tapsominga sânginne.

²⁶ Pattangajut nerrijuksauvut, ᴋâgungnaituksaulutiglo; Nâlekamiglo apperᴋuteᴋartut nakorijomârpât; ômattise innôjuksauvut issoᴋangitomut.

²⁷ Erᴋaijomârput, sâleromârlutiglo Nâlekamut sillaksub issunginêtut, sângnelo tuksiaromârput nallojut kinguvârêngit illunatik.

²⁸ Nâlegak nâlegauveᴋarmat, attanniotilunelo nallojut akkorngane.

²⁹ Koinijut nuname illunatik nerrijomârput, opigosugomârlutiglo; sângane sêrᴋut sêrᴋortoromârput illunatik, sannermut ununga ijuᴋartut, inôserminiglo piuliklerungnalaungitok.

³⁰ Kinguvâkaromârpok kivgartortunnik tâpsominga; Nâlegak unipkautigijaujomârpok ᴋittorngat ᴋittornganginnut.

³¹ ᴋaijomârput, idluarningalo unipkautigijomârpât inugasaksoarnut erniangojomârtunnut, tâmna piniarlaungmat tamattominga.