Imgerut 19 - Labrador Inuttitut Heritage Bible

Gudib ânanaudlarninga, saᴋᴋijârtok pingortitannit perᴋojannillo.

Davidib imgerutâ imgerutigilugo.

¹ ᴋillait Gûdib opinarninga unipkautigivât, aulangitublo aggangita pinniarningit oᴋautigivait.

² Uvlut illangata assiminut oᴋautigivâ, unnuablo assiminut akpautigivâ.

³ Oᴋarneᴋangilak oᴋauseᴋaranelo nippinganik tussarviolungitomik.

⁴ Noakservalautinga annivok nunet illunaita ᴋângagôrvigivlugit, oᴋarningalo sillaksub issuanut pivok; seᴋᴋinek tuppeᴋartilaukpâ taipᴋonane;

⁵ Tâmnalo annivok uiksatut inniminit, ᴋuviasuklunelo sâlaᴋartotut, apᴋosinek akpangervigilugolo.

⁶ Nuilerpok ᴋillaub issuata aipâne, ᴋaivalailunelo ingergavok ama tâpsoma issua tikkilugo; sagvangitoᴋangilarlo ônarninganut.

⁷ Nâlekab malligaksauᴋojangit ᴋanoêtoᴋatsangilat, tarnelo nakkoksitipât. Nâlekab kigligiudsiningit nallâgôrput, sillatutipaillo sillaitut.

⁸ Nâlekab piniartauᴋojangit tammartovineᴋajuiput, ᴋuviasuktilâlo ômat. Nâlekab perᴋojangit illaᴋangilat, ᴋaumaksartipaillo ijit.

⁹ Nâlekab sivuranarninga ivsornaipok itsainarlunelo issoᴋangitomut. Nâlekab idluarijangit mikseᴋartôvut, idluartôlutiglo illunatik.

¹⁰ Pivianarnersauvut Goldemit, unuktunnillo Goldenit illaᴋangitunnit; mamarnersauvut igupsaujârtut orksunginnit, tâpkoalo orksungita ingningenit.

¹¹ Kivgaittauk tâpkonunga ᴋaumaksartauvok; malliktorlo tamakkoninga angijomik akkilertauvok.

¹² Kina tammarnime unnurninginik ᴋaujimava? Issumagijungnaivigilaunga tammarnimnit ᴋaujimangitamnit.

¹³ Kivgait sapputilauruk piojorijunnit, attanioterᴋonnagit uvamnut; tagva tammartovineᴋarniangilanga, passijaksaungitsainarniarpungalo idluitullinersoarnut.

¹⁴ ᴋannerma oᴋausingit, ômattimalo unipkausingit ᴋuviagijaulît sângne, Nâlegâk, torᴋorviksaᴋautigijara, piulijigalo.