Imgerut 18 - Labrador Inuttitut Heritage Bible

Davidib ᴋujalininga, ikajortauninga tattamnadlartok piulijauningalo ômigijinginit tamainit, pivlugo.

Imgerut imgerutigilugo. Davidemit Nâlekab kivganganit, oᴋalauktomit Nâlekamut imgerutsib tamattoma oᴋausertanginnik, nalliutome Nalekab piulilaungmago ômigijingita illunatik agganginnit, Sauliblo agganginnit;

¹ Oᴋarporlo: Omamut nagligivagit, Nâlegak, pitsartunerijara;

² Nâlegak ᴋairtorijara, serngnigijiksaᴋautigijaralo, piulijigalo; Gûdiga torᴋorviksaᴋautigijara tattigijara, sappulutaksarijara, piulijauviksamalo sakkunga, sapputsijigalo.

³ Nâlegak nertoromavara nipliavigijomalugolo, tagva ômigijimnit piulijauniarpunga.

⁴ Toᴋᴋub ᴋellarutingita illumalaungmanga, Beliablo kôngita ᴋoaksârtilaukpânga;

⁵ Kappianartoviub ᴋellarutingita nappilaukpânga, toᴋᴋublo aklunângita opingalaukpânga.

⁶ Kappiasungnimne Nâlegak nipliavigivara, ᴋaigarsuklungalo Gudimnut; tagva nippiga tussarpâ Tempeleᴋotiminit, ᴋaigarsungneralo sânganut siutikingnut, pivok.

⁷ Nuna sajukpilalaukpok, aulatitaulunelo, ᴋaᴋᴋiallo tungavingit aulavut sajukpilalutiglo ningaumajartillugo.

⁸ Iserluk ᴋongmualaukpok kinganganit, ikkomalo nungutsijok ᴋanninganit, auma annilaukpok tâpsomangat.

⁹ ᴋillak nakiglitilaukpâ aᴋᴋarlunelo, tâktoᴋalaukporlo ittiggangita attâne.

¹⁰ Kêrubib ᴋângane ablângavok, tingilunelo tagvunga; ikkiaᴋilaukporlo annorib esarungine.

¹¹ Tuppinga avatâne tâktoksôniolaukpok, nuvujangolunelo kernertunnik silliktunniglo ijersimavinga.

¹² Keblidlarnermut sânganêtomut nuvujangit alliktorput nattarᴋonâlungnut ᴋaumalangnullo.

¹³ Nâlegarlo kallilaukpok ᴋillangme, ᴋotsingnerpângojublo nippine annitipa nattarkonâluktigut aumatigullo ikkomaliktigut.

¹⁴ Karᴋjoᴋotinelo pittiksautilaukpait, siamartilaitalo, ᴋaumalaktitsilaukporlo, ᴋoaksârtipaillo (Gudeᴋangitut).

¹⁵ Tagva immiksuit kôdlartut takᴋojaulaukput, nunaksublo tungavinga ulligêrtaumalaukpok, suadlarnermut Nâlegak, ᴋingavîllo annerningata annerteridlarninganut.

¹⁶ Tâmna tilliklilaukpok ᴋôtsiktomit ailungalo; ᴋaᴋᴋilaukpângalo imaksoarnit.

¹⁷ Piulilaukpânga ômigijimnit pitsartujomit, ômigijimnit sangiluadlalauktunnit uvamnut;

¹⁸ Opingailauktunnit uvamnik ᴋannoênima nalliuningane; Nâlegarle sukkarilaukpara;

¹⁹ Tâpsomalo annitilaukpânga initojomut; nussulaukpânga ᴋuviagilauraminga.

²⁰ Nâlekab ajungitullivigivânga idluarnera malliklugo; akkiniarpânga aggama ivsornaininget malliklugo.

²¹ Uvanga Nâlekab apᴋosiningit attorapkit, idluiluklungalo nûlungilanga Gûdimnit.

²² Idluarijangit illunaita ijingma sângangnêmatta, perᴋojangillo egilungilakka uvamnit;

²³ Idluineᴋalungilangalo sângane, ulloreasuklungalo ajornimnik.

²⁴ Tamanna pivlugo Nâlekab akkiniarvigivânga idluarnera malliklugo, aggama ivsornainingat ijikita sângangne malliklugo.

²⁵ Hailigeôjunne hailigeôvotit, idluartunelo idluarpotit,

²⁶ Ivsornaitunne ivsornaipotit, mumiksimajunne mumiksimavotit.

²⁷ Innugasaksuit ajulertut ikajorangne, ijillo pimariutertut manigotitipâttit.

²⁸ Igvit ᴋaumautiga ᴋaumaksarangne, Nâlekama Gûdima tângnera ᴋaumaniôtipâ.

²⁹ Aiparilutit sorsuktut pittarungnarapkit, Gûdigalo aiparellugo avaloksuit aptusarvigijungnarpakka.

³⁰ Gûdib apᴋosiningit ᴋannoetoᴋatsangilat; Nâlekab oᴋausingit illaᴋangilat. Sappulutauvok illunainut Tatteᴋartunnut tâpsominga.

³¹ Kinale Gûdeôva Nâlegak pinago? Kinalonêt torᴋorviksaᴋautauvâ, Gûdivut pinago?

³² Gûdib pitsartuneartipânga, apᴋosinikkalo tammarnartoᴋajuitipait.

³³ Ittiggakka tuktut ittiggangititut îtipait, pitilungalo poktojoᴋotimnut.

³⁴ Tâpsoma aggakka ajochertorpait sorsungnermik, talleralo ajochertorpâ pittikse ᴋannujaujok ᴋellulugo.

³⁵ Igvit piuliklernivît sappulutanganik tunnitsivigivarma, tallerpikpîllo pitsartutipânga; nikkanarsârnivîllo angijorortipânga.

³⁶ Attimne inniksaᴋartitsivotit pissungnermut, ittegakka uniorterᴋonnagik.

³⁷ Omigijikka udlatsomavakka, tigujomalugillo, utteromalungilangalo toᴋᴋotserᴋârnanga tâpkoninga.

³⁸ Egilugit serᴋomitsomavakka makkitsungnarᴋonnagit; ittikkama attânut ochojuksauvut.

³⁹ Pitsartuneᴋartitsungnarparma sorsungnermut, akkerartortikka ochotipâttit attimnut.

⁴⁰ Omigijikka ᴋemâtipâttit, asseroerᴋovlunga ômisuktunik uvamnik.

⁴¹ Nipliavut, tagvanele ikajorteᴋangilak; Nâlekamut, tâpsomale kiolungilait.

⁴² Toggarlugit serᴋalitipakka sanniktitut annoreme, pêjarpakka allorluktitut apᴋosinerme.

⁴³ Ikajorparma inugasaksuit annârtorninginit, angajoᴋângortiparma nallojut akkorngane, innuᴋattigêksuit illitarilaungitama kivgartorpânga.

⁴⁴ Nâlekpânga siutinnut nâlatsiartunnut; tujormitjat ᴋittorngangita illanersârlutik oᴋarvigivânga.

⁴⁵ Tujormitjat perlerput nimâjalutiglo igloksoamingnit sôngojunnit.

⁴⁶ Nâlegak ômavok, torkorviksaᴋautigalo nertortaule; piulijauviksamalo Gûdinga angijorortitaule.

⁴⁷ Gûde tâmna, akkiniarnermik tunnijijok uvamnut, innuᴋattigêksoarniglo ajoringorsaijok attimnut;

⁴⁸ Piuliklerte uvamnik ômigijimnit, ᴋagvertigalo tâpᴋonangat akkerartortimnit; igvit ikajorparma koksalaitunnit.

⁴⁹ Tamanna pivlugo ᴋujagijomavagit Nâlegak nallojut akkorngane, attillo imgervigilugo nertordlerutiksenik;

⁵⁰ Attanneᴋotiminut piulijauneᴋartitsijok angijoksoarmik, ajungitullijorlo mingoartitaminut Davidemut, tâpsomalo kinguvânginnut soraijuitomik.