Imgerut 17 - Labrador Inuttitut Heritage Bible

Tuksiarnek sapputijaujomamut sillaksoarmiut sugaluktut akkornganne.

Davidib imgerutâ.

¹ Nalegak idluarnek tussalauruk, ᴋuggudlarnera kamagilauruk, tuksiarnera timerolauruk, ᴋannermit nallangaitomit pingitok.

² Illingnit idluarsartaunera pile, ijikik takkonâlaulik nallâgôrnermik.

³ Igvit ômattiga ôktorlaukpat, unnuamelo nallipsarlaukpat, kiglissiniarlungalo nachvângilattillo sumik; ᴋajusimalaukpunga ᴋannera tappajuksaungimat.

⁴ Inuit illiorninginne kangasinâkpit oᴋausingit malligaksarilaukpakka, sapputilungalo aksorornermut idluitullijub apᴋotinganit.

⁵ Arvertarnera apᴋosinernêtsainartilauruk, ablornikka uniorkserᴋonnagit.

⁶ Illingnut nipliadlarpunga, igvit Gude tussaramga; siutikik mannikik uvamnut, oᴋautsikka tussarkit.

⁷ Pitsiarnit tattamnartok saᴋᴋertilauruk, piuliklerteôjotit tatteᴋartunnik illingnik, tâpᴋonangat akkerartortunnit aggangnut tallerpingnut.

⁸ Sappumijalaunga ijib takᴋonatingatut sorlo, ijertilaunga esarokpit tachaliningane;

⁹ Gûdeᴋangitunnit asserorsartimnit ômigijimnit tarnimnik pinasuartunnit avatimne illûnane.

¹⁰ Omattitik ikpigineᴋangitut pallangairpait; ᴋannermingnut pimariuterlutik oᴋarput.

¹¹ Nane arvertarviptingne illumavâtigut, ijitik torârtipait tagvunga, ochotitsomavluta nunamut;

¹² Loevetut îput nerᴋiᴋsasiortotut, Loeviaraktullo inimine aᴋᴋopijotut.

¹³ Nâlegak oppalungairit, ingiariartoruk, manigotitilugolo Nâlegâk; tarniga piulilauruk Gûdeᴋangitunnit saviksoaᴋotingnut.

¹⁴ Innungnit aggangnut, Nâlegâk, sillaksub innunginnit, illangiusiamingnik peᴋartunit inôtseme, aᴋᴋeartortitarnit pingnik, ᴋittorngaᴋartunit unnuktunnik, amiakomingniglo ᴋemaijunnit ᴋittorngamingnut.

¹⁵ Uvangale kênet tautugomârpara idluarnerme; kâgungnairomârlungalo tuppagomâruma adseᴋarlunga illingnik.