Imgerut 16 - Labrador Inuttitut Heritage Bible

Kristusib âniajub Gûde, sapputsijok ânanausêjorlo tâpsominga, nertorpâ.

Davidib ivlerijanga.

¹ Sapputilaunga Gûde, igvit tattigigapkit.

² Oᴋarpotit Nâlekamut: Igvit nâlegauvotit, pilloringneᴋangilak uvamnut assingne;

³ Ivsornaitut nunamêtut, ânanausijaujullo, tâpkoa illunaita ᴋuviagivakka.

⁴ Taipkoa assianik pinasuartut, âniaᴋarniarput unnuktunnik; tunnergutingenik imiksamik aungôjomik tunnijijomalungilanga, attingillonêt taijomalungilakka ᴋannimnut.

⁵ Nâlegarle perᴋutigivara, illangiusiarijaralo ermgusiârsungmit; igvit kingormgutijara udsertorpat.

⁶ Imerautib nallaupânga namatsiartomik; ila kingormgutijamik ânanaudlartomik pivunga.

⁷ Nâlegak nertorpara attanertortiga; unnuamêtauk taktuma ᴋaiblarpânga.

⁸ Nâlegak tautuᴋôtsainarpara; tallerpimnêmât aulaniangilanga.

⁹ Tamanna pivlugo ômattiga ᴋuviasukpok, annerneralo, opinarneralo (tarniga) serridlarpuk; uvinigalotauk ussornarnartome inneᴋaromârpok.

¹⁰ Tarniga annernerit inninginêtsainarkojomânginangne, perᴋojijomângilatillo ajunginerit asserornermik (illuverme) takkoᴋovlugo.

¹¹ Igvit innôtsib apᴋosininganik nallojungnaitiparma; ᴋuviasungneᴋadlarpok arklingnartomik kênavit sângane, illiorneᴋalunelo inerᴋonartomik tallerpit sanniane issoᴋangitomut.