Imgerut 149 - Labrador Inuttitut Heritage Bible

Gûdib nertortauninga inuᴋotiminut saimarvigijaujunut.

¹ Hallêluja. Nalegak imgervigissiuk imgerusertâmik, nertortauninganik ivsornaitut illagêngninginne.

² Israelitit sannajigilauktatik ᴋuviagilitsuk; Zionib ᴋittorngangita attannitik serrigilitsuk.

³ Attinga nertoraksarivât okigêserlutik; ᴋillautinut, Harfinnullo nipliajorvigijaksarivât.

⁴ Nâlekab innuᴋotine ᴋuviagingmagit; pattangajut pinarnarsitipait ikajortaunermik.

⁵ Ivsornaitut ânanaunek tamanna serrijutigijaksarivât, nertordlertuksaulutiglo inangavingmingnêdlutik.

⁶ ᴋaningita Gûde angijorortitaksarivât; tigumiartuksaulutiglo aggamingne saviksoarnik igluktut kênalingnik;

⁷ Akkiniarᴋovlugit nallojut akkorngane;

⁸ Attanningit ᴋellaksorlugit ᴋellaumgujanut, opinartoᴋotingillo ᴋellarutinnut kikkiangôjunnut;

⁹ Pinniarvigilugit namanermik piᴋovlugit aglaksimajomik. Ivsornaitoᴋotingit illûnatik taimaitomik opinarneᴋaromârput. Hallêluja.