Imgerut 147 - Labrador Inuttitut Heritage Bible

Nertordlernek Gûdib ajûngitulliningit tarnemut timemullo pivlugit.

¹ Nalegak nertorsiuk; Gûdivut nertorlugo imgervigilugo pivianarmat; nertordlernek taimaitok tussarnidlartok ânanaulunelo.

² Nâlekab Jerusaleme sannavait, aijaliktaumajullo Israeleme kattersorpait.

³ Serᴋomisimajunik ômattiggit innûlivait, mangipsertorlugillo ânianingit.

⁴ Uvloritsat kittipait, tailugillo illûnaita attingittigut.

⁵ Nâlegavut angijôvok, pitsartojoksôlulunelo; sillatoningalo ôktortaujungnatsangilak.

⁶ Nâlekab pattangajut makkitipait, Gûdeᴋangitullo pinguvait nunamut.

⁷ Nalleᴋârluse Nâlegak ᴋujagilugo imgervigissiuk; Gûdivut nipliajorvigissiuk Harfinnut.

⁸ ᴋillangmik ulliksijok nuvujanut, sillalungmiglo âᴋiksoijok nunamut; iviksukannik perorsatitsijok ᴋakᴋane.

⁹ Omajunnik nerᴋiᴋsaᴋartitsijok, tullugarᴋanik nipliajunnik tâpsomunga.

¹⁰ Horsib sôngoninga ᴋuviagingilâ, ᴋuviasutigingilaillonêt kia sauningit.

¹¹ Nâlekab sivôragijine ᴋuviagivait, pitsiarninganik sungertuteartut.

¹² Jerusalem Nâlêgak nakoriuk; Zione Gûdit nertoruk.

¹³ Tâpsoma upᴋoaksoavît sanneroangit atsungertimagit, saimartipaillo ᴋittorngattit illingne.

¹⁴ Ullapirsauteᴋartitsivok kiglilervingne, namaksitipâtillo ᴋakᴋôjaksatsiangonerpangôjunut.

¹⁵ Oᴋâlanine tillivait nunamut; oᴋausingit sukkalidlarput.

¹⁶ Appumik tunnijivok saukab merkungititut, ᴋaᴋᴋornait kattararpait arᴋsatitut.

¹⁷ Nattarᴋonâluᴋotine serᴋitivait tamuatitut; kia itjinga sappingiᴋaûk?

¹⁸ Tâmna oᴋarpok, tagva auksarpok; annoreᴋotine annordlerᴋovâ, tagva aukpok.

¹⁹ Oᴋauserminik Jako ᴋaujitipâ, Israele illusioᴋojaminik, idluarijaminiglo.

²⁰ Nallojut nallîllonêt taimailiorvigingilait, idluarijangillo illitarilungilait. Hallêluja.