Imgerut 146 - Labrador Inuttitut Heritage Bible

Nertordlernek Gûdib nertornarninganik issoᴋangitomik.

¹ Halleluja. Tarnik Nâlegak nertoruk!

² Nâlegak nertoromavara inôtsima sivitûningane tamât, Gûdigalo nertorlugo imgervigijomavara înimne.

³ Attannît sungertutiginiarassigik; inuôvut, tâpkoa ikajorungnangilat ilâ.

⁴ Innub annerninga nûleriaᴋarmat, îvjungortuksaumilunelo; tagva ᴋajusimaningit tamaita assiovut.

⁵ Pilloringnarmêk, ikajorteᴋartok Jakob Gûdinganik, sungertuteᴋartok Nâlekamik Gûdiminik;

⁶ Sannalauktomik ᴋillangmik, nunamik, imarbingmik; tamainiglo tâpᴋonanêtunik; okpernartomiglo issoᴋangitomut.

⁷ Idluarnermik sakᴋêjomik aksorutijaujunut; nerrititsijomik ᴋâktunnîk. Nâlekab parngnanairsortat ᴋellarudjarpait.

⁸ Nâlekab tautungitut tautuktipait. Nâlekab kattalungajut maksoatipait. Nâlekab idluartut nagligivait.

⁹ Nâlekab tujormitjat sapputivait, illiârsuillo uigarnerillo pattangaitipait, Gûdeᴋangitullo apᴋosininget mumiktipâ.

¹⁰ Nâlegak attaniôvok issoᴋangitomut, Gûdeotsainarpok illingnut Zion sorairane. Hallêluja.