Imgerut 145 - Labrador Inuttitut Heritage Bible

Nertordlerutiksak Gûdib angijôninga sôngoningalo pivlugik.

Davidib nertordlerutiksanga.

¹ Angijorortitsomavagit, Gûdiga, attaniôjotit, attillo nertutsainaromavara issoᴋangitomut.

² Uvlut tamaita nertoromavagit, attillo nakoritsainarlugo sorairnanga issoᴋangitomut.

³ Nâlegak angijôvok, nertornadlarlunelo, anginingalo nautsertortaujungnangilak.

⁴ ᴋittorngat ᴋittorngangita pinniarnitit nakorijomârpait, oᴋautigijomârlugolo pitsartunît.

⁵ Ananaunît pinarnartoksôjok takkoranidlartok, tattamnartullinitillo imgerusiorutigijomavakka.

⁶ Pitsartunît kappianartok oᴋautigijauᴋovlugo, angijônît unipkautigijomavara.

⁷ Pitsiarnivit unurninga nakorijauluarᴋovlugo, idluarnîllo igiaᴋomijarutigijauᴋovlugo.

⁸ Nâlegak saimarveᴋarpok, nâpkigosuklunelo, ᴋennuêlunelo, pitsiarlunelo angijomik.

⁹ Nâlegak pitsiarpok illûnainut, piniartanelo tamaita nâpkigivait.

¹⁰ Piniartavît illûnatik ᴋujagijaksarivâtit Nâlegak, ivsornaitoᴋotivîllo nertoraksarivâtit;

¹¹ Attaniovikpîllo opinarninga nakorilugo, sôngojoksonîllo oᴋautigilugo.

¹² Inuit ᴋittorngangit pitsartunernik nallojungnailerᴋovlugit, attaniôvikpillo ânanauninganik pinnarnadlartomik.

¹³ Nâlegauvît nâlegauviôvok issoᴋangitok, attanniôtinillo îtsainarpok sorairane.

¹⁴ Nâlekab pâlaktut tamaita najumivait, maksoatilaitalo illûnaita kattalungajut.

¹⁵ Illûnatik ijingita miperpâtit; igvillo nerᴋiᴋsanginnik tunnitsivigivâttit nalliuningine.

¹⁶ Igvit aggaktit issivitipâttit, annerneggillo illûnaita namaksitipattit ᴋuviasuklutit.

¹⁷ Nâlegak idluarpok apᴋotimine tamaine, ivsornailunelo pinniarnermine tamaine.

¹⁸ Nâlegak ᴋannipok illûnainut nipliavigijiminut, illûnainut illungertorlutik nipliajunnut tâpsomunga.

¹⁹ Piniarpok Gûdemik sivôrajut ᴋajungerninginnik, niplianingillo tussarpait ikajorlugillo.

²⁰ Nâlekab nagligijine illûnaita sapputivait, Gûdeᴋangitullo tamaita nungutsomârpait.

²¹ Kanerma Nâlekab nertornautâ oᴋautigijaksarivâ, uviniggillo illûnatik attinga hailigeojok nertutsainarlitsuk sorairatik issoᴋangitomut.