Imgerut 143 - Labrador Inuttitut Heritage Bible

Tuksiarnek piulijaujomamut ômisuktunnit, tassiortaujomamullo apᴋome ajungitome.

Davidib imgerutâ.

¹ Nalegak tuksiarnera tussalauruk, ᴋennunera tussalauruk mikseᴋârnît pivlugo.

² Kivgaillo erᴋartorniarnago pît; sângne idluartoᴋatsangimat inôjut akkorngane.

³ Omisuktub tarniga unangmingmago, innôseralo anaulugo ochotipâ nunamut; nallatipânga tâktomut, toᴋᴋungajutitut sillaksoarme.

⁴ Annerneralo illumne kappiasukpok; ômattiga illumne asserorsimavok.

⁵ Nalliunerit ᴋângersimajut erᴋaumavakka, piniarnerijattit tamaita issumaksarsiorutigivakka, aggakpit pinniarningit issumakut nautserorasuarpakka.

⁶ Aggakka issakpakka illingnut; tarnima imerugvigivâtit nunatut pannertotut, Sêla.

⁷ Nâlegak ᴋillamik tussaksâlaunga, annernera nunguvalliangmat; kênait ijertailiuk sâmnit, adseᴋalerᴋonanga tâpkoninga ittersalliartunnik.

⁸ Uvlarârsukut tussarᴋovlunga saimarveᴋarnernik, tattigigapkit. Nallojungnaitilaunga apᴋosinermik arvertarviksamnik; ᴋajungervigigapkit.

⁹ Nâlegak piulilaunga ômigijimnit, igvit ᴋemâviginasuarpagit.

¹⁰ Ajochertulaunga ᴋuviagijarnik pinniarᴋovlunga, Gûdigigapkit; annernerpît ajungitub tassiorlinga apᴋome manniktome.

¹¹ Nâlegak nakkoksitilaunga attît pivlugo; tarniga kappianartomit annitilauruk, idluarnît pivlugo.

¹² Omigijikkalo asserorkit pitsiarnît pivlugo inuarlugillo illûnaita tarnimnik kappiasuktitsijut; kivgarigamga.