Imgerut 142 - Labrador Inuttitut Heritage Bible

Tuksiarnek, ikajortaujomamut kappiasungnerme.

Davidib illisaininga, tuksiarnek ᴋairosungmêdlune.

¹ Nalekamut nipliadlarpunga nippimnut; ᴋenuvunga Nâlekamut nippimnut.

² Arusungnera nâvipara sângane; siorniornera sakᴋertipara sângane.

³ Anernera kappiaktoalerangat, tagva igvit apᴋosinera illitarivat. Aklunânik illijivigivânga apᴋosinerme arvertarvimne.

⁴ Tallerpingmut takkosarpunga, ahâglo, tagva kialonêt illitarijomangilânga. Namut ᴋemâjungnangilanga, kialonêt tarniga kamagingilâ.

⁵ Nâlegak illingnut nipliadlarpunga, oᴋarlungalo: Igvit tattigivagit, illangiusiarivagit inôjut nunangene.

⁶ ᴋaigarsungnera kamagiuk, nukkingêrotidlarama; piulilaunga unnangmijimnit, sôngoluarmatta uvamnut.

⁷ Tarniga parngnanairsimavingmit annitilauruk, attit ᴋujagilugo perᴋovlunga. Idluartut kattilerniarput uvamnut, igvit ajungitullivigigumga.