Imgerut 140 - Labrador Inuttitut Heritage Bible

Tuksiarnek ikajortaujomamut ômisuktut unangmiklertillugit.

Davidib imgerutâ imgerutigilugo.

¹ Piulilaunga Nâlegak innungnit idluitunnit; sapputilaunga innungnit pinnialuktunnit;

² Idluitomik issumaksarsiortut ômattimingne, uvlullo tamaita unatadlarneᴋartitsijut.

³ Oᴋatik ipiksarpait ᴋuglugiangojârtotut, ᴋuglugiarâlub toᴋᴋonartunga tâpkoa kangasinânginêpok, Sêla.

⁴ Sapputilaunga, Nâlegak, Gûdeᴋangitut agganginit; udsertulaunga, innungnit pinnialuktunnit, arvertarnimnik ochotitsinasuartunnit.

⁵ Piojôrijut nikannik akunâniglo illijivigivânga; nullutjat issivipait apᴋosiniub sanniane, mikkigianniglo âᴋiksoivigivânga, Sêla.

⁶ Uvangale Nâlekamut oᴋarpunga: Igvit Gûdigivagit; Nâlegak ᴋennunima nippinga tussalauruk.

⁷ Nâlegak, Nâlegak, ikajortiga sôngojok, igvit niaᴋora serngnigivat sorsungnerub nalliuningane.

⁸ Nâlegak Gûdeᴋangitok kajungervigijanganik tunnitsivigitailiuk; koksalaininga sullitailitiuk piojorijutiginajarmatsuk, Sêla.

⁹ Illumajima niaᴋunginnut kangasinângita siorniornarninget kattagle.

¹⁰ Tâpsoma aumanik nâvitsivigijomârpait; kattaktitsomârpait ikkomamut ittinersoarnut, makkitsuitsainarᴋovlugit.

¹¹ Kannelik idluitomik pilloringneᴋarniangilak nuname; innuk pinniarluktok idluitok aijaliktaujomârpok ochotitaujomârlunelo.

¹² Kaujimavunga Nâlekab pattangajub illiorninga aklujullo idluarningit âᴋijomârmagit.

¹³ Ila, idluartut attit ᴋujagijomârpât, idluitailijullo kênavit sânganêtsainaromârput.