Imgerut 135 - Labrador Inuttitut Heritage Bible

Nertordlerutiksak Gûdemut ajugaᴋangitomut.

¹ Hallêluja. Nalekab attinga nertorsiuk; kivgaujose Nâlekamut nertordleritse;

² Nangertose Nâlekab iglungane, Gudipta iglungata avalungita illuane.

³ Nâlegak nertorsiuk Nâlegak illanâᴋarmat; attinga nertorlugo imgervigissiuk, tâmna innerᴋonarmat.

⁴ Nâlekab Jako annerilaungmago ingminut, Israelelo perᴋotiminut.

⁵ Kaujimagama, Nâlegak angijôngmat, Nâlegaungmallo uvaptingnut, Gûdinit tamainit.

⁶ Nâlekab tamaita pijomajane piniarpait, ᴋillangme nunamelo, imarbingme ittinersoanelo tamaine.

⁷ Nuvujannik ᴋongmuartitsijub nunab issunginit; ᴋaumalangnik sillalungortitsijub; annoremik sakᴋêjub perᴋutitaliᴋotiminit,

⁸ Erniangoᴋârtunik annaunilauktub Egipteneme, tamarmik inuit nergjutillo.

⁹ Nallonaikutaminik tattamnartullinerminiglo tikkerᴋojilauktub illingnut, Egiptenemiut nunangannut, Faraomut kivganginullo illûnainut.

¹⁰ Innuᴋattigêksoarnik unnuktunik annaunilauktub, toᴋᴋotsilauktublo attannernik pitsartunelingnik.

¹¹ Sihonemik Amoriterit attanninganik, Ogemik attanniolauktomik Basaneme, Kanaaniblo attaniovinginnik tamainik.

¹² Nunanginniglo tunijilauktub kingormgutijauᴋovlugo, inuᴋotiminut Israelitinut kingormgutijauᴋovlugo.

¹³ Nâlegak, attit îtsainarpok issoᴋangitomut; erᴋaumajaunîllo Nâlegak, îtsainaromârpok sorairane.

¹⁴ Nâlekab inuᴋotine erᴋartoromârmagit kivgaᴋotinelo nâpkigilugit.

¹⁵ Nallojut Gûdingoangit Silbereôvut, Goldeôlarmiglo Inuit aggangita sannamajangit.

¹⁶ Kaneᴋarput oᴋalungilallo; ijeᴋarput tautugatiglo;

¹⁷ Siuteᴋarput, tussaratiglo, annerneᴋangilarlo tâpkoa ᴋaninginne.

¹⁸ Taimaitunik sannajut taimaiᴋatiginiarivait; illûnatik taimaitunnik tatteᴋartut.

¹⁹ Israelekut Nâlegak nertorlitsuk; illipse Aronekunnit pijose, Nâlegak nertorsiuk;

²⁰ Illipse Levikunnit pijose, Nâlegak nertorsiuk; Nâlekamik sivurajose, Nâlegak nertorsiuk.

²¹ Nâlegak nertortaule Zionemit, Jerusaleme ineᴋartok. Hallêluja.