Imgerut 132 - Labrador Inuttitut Heritage Bible

Tuksiarnek Davidib iglunga Gûdiblo kivgartortauninga nallâgôrtok âᴋiktauᴋovlugik.

Imgerut imgerutigilugo uvloksioriartortunnut Jerusalemut.

¹ Nalegak Davide erᴋaumaguk, ânianingillo tamaita.

² Oᴋamarilauktok Nâlekamut, angilauktorlo Jakob pitsartojoᴋotinganut:

³ Igluma pânganut itteromalungilanga, ᴋagveromanangalonêt inangavimnut.

⁴ Ijîka sinnerᴋojomangilâka, sikkungerᴋojomangilâkalonêt.

⁵ Nachvârᴋârnanga inniksamik Nâlekamut, iglomik Jakob pitsartojoᴋotinganut.

⁶ Ahâk, tamanna tussaumavavut Efrateme; nachvârpavut nappârtut naternangene.

⁷ Iglunginnut itteromavogut, opigosugomalutalo ikovrangata sângane.

⁸ Nâlegak oppalungairit tikkitsomavlutit merngoêrservingnut, igvit pitsartunivîllo iklervinga.

⁹ Ajochertuijoᴋotitit idluarnermik annorârlit ivsornaitoᴋotitillo ᴋuviasuglit.

¹⁰ Kivgait Davide pivlugo, mingoartavît kênanga allartiniarnago pît.

¹¹ Nâlekab Davide soᴋᴋoserungnangitomik angervigilaukpâ, tamanna allarniangilâ: Iksivautaᴋotingnut ingititsijomavunga timivît kinguvâksanganik.

¹² ᴋittorngaᴋotivit angernera nâlangniarpatsuk, kigligiutsineralo ajochertutiginiartara tâpkonunga; tagva ᴋittorngangittauk iksivajuksauvut iksivautarne sorairatik.

¹³ Nâlekab Zione annerilaungmago, ᴋuviasuteᴋarporlo tagvane ineᴋaromavlune.

¹⁴ Tamanna merngoêrserviga soraijuitomik, mâne ineᴋaromavunga; ᴋuviagigapᴋo.

¹⁵ Nerᴋiksangit pitsartutitsomavakka, aklujungillo nerᴋiksaᴋartitsomavakka namaktomik.

¹⁶ Ajochertuijungit piulijaunermik annorâromavakka, ivsornaitungillo ᴋuviasuktuksauvut.

¹⁷ Tagvane Davidib nakjunga nuerᴋojomavara, mingoartaralo ᴋaumaumik âᴋiksoivigilaukpara.

¹⁸ Omigijingit kangusuktitaunermik annorâromavakka; tâpsomale ᴋângane niaᴋotâ nuvugolârtârtuksauvok.