Imgerut 119 - Labrador Inuttitut Heritage Bible

Omattib kigligiudsiningit Gûdib Oᴋausingita nakkoksinarninget pivlugo.

¹ Pillorikput tâpkoa passijaksaunatik innôjut, arvertartut Nâlekab malligaksauᴋojangit malliklugit.

² Pillorikput tâpsoma kigligiutsininginik nâlektut, ᴋennertut tâpsominga ômamut tamânut.

³ Tâpsoma apᴋosiningane arvertartut idluitullilunginamik.

⁴ Perᴋojilaukpotit pinniartauᴋojattit mallitsiarlugit attaruilijomik.

⁵ ᴋannoktôk inôtsima idluarijattit nâlakligit koksasungnermut nallâgôrtomut!

⁶ Perᴋojattit illûnaita nautsertorupkit, tagva kangusuktitauniangilanga.

⁷ ᴋujagivagit ômamut nallâgôrtomut, idluarnivît idluarijangit illiniarupkit.

⁸ Malliktauᴋojattit nâlagomavakka; ᴋemmaniarnanga soraijunak.

⁹ ᴋannok innuosuktok apᴋosinermine passijaksaunane arvertarniarᴋâ? Oᴋautsitit malliklugit piniarune.

¹⁰ ᴋennerpagit ômamut tamânut; tappagitailitilaunga perᴋojarnik.

¹¹ Oᴋautsitit torᴋorpakka ômattimne, idluitullerᴋonanga illingnut.

¹² Nertortait Nâlegak! Ajochertulaunga idluarijarnik.

¹³ Kangasinâmnut ᴋannerpit idluarijangit tamaita unipkautigijomavakka.

¹⁴ Kigligiutsinivît apᴋotingat ᴋuviagivara, akluinartutitut sunatuinatitut pivlugit sorlo.

¹⁵ Piniartauᴋojattit issumaksarsiorutigivakka apᴋosinitillo kamagivakka.

¹⁶ Idluarijattit ᴋuviasutigivakka, oᴋautsitillo puigorlungilakka.

¹⁷ Kivgait ajungitullivigiuk, innôᴋovlunga, nâlatsiarᴋovlungalo oᴋausernik.

¹⁸ Ijîkka uitâtikik takkoᴋovlunga malligaksauᴋojavît tattamnartullininginik.

¹⁹ Tujormijangôvunga nuname; perᴋojattit ijerniarnagit sâmnit!

²⁰ Tarniga serᴋomisimavok ᴋillanâtsainarmut idluarijarnik.

²¹ Piojorijut suarpattit; ôminartôvut perᴋojarnik tappajut.

²² ᴋângunarnek nachonarnerlo sangutikik, kigligiutsinitit nalagapkit.

²³ Attannît iksivaᴋattigêkputtauk oᴋautigilungalo akkerartorlunga; kivgaᴋotivîlle idluarijattit oᴋautigivait.

²⁴ Ilâ kigligiutsinitit alliagivakka, attannertortigivakkalo.

²⁵ Tarniga nallavok sanningne; nakkoksitilaunga oᴋautsitit malliklugit.

²⁶ Apᴋosinitit unnipkautigivakka, igvillo tussarparma; ajochertulaunga idluarijarnik.

²⁷ Illisalaunga piniartauᴋojavît apᴋosininginnik; tagva tattamnartullinitit oᴋautigijomavakka.

²⁸ Tarniga auksilerpok issumajârnermut; maksoatilaunga oᴋautsitit malliklugit.

²⁹ Apᴋut tammarnartok sangutilauruk uvamnit, annerpagilaungalo malligaksauᴋojarnik.

³⁰ Mikseᴋârnerub apᴋosininga annerilaukpara, idluarijattit pitilaukpakka sâmnut.

³¹ Kigligiutsinitit ungagivakka; Nâlegak kangusuktitauᴋoniarnangatôk.

³² Igvit ômattiga manigorungne, tagva perᴋojavît apᴋosiningat akpangervigivara.

³³ Unertutilaunga Nâlegak idluarijavit apᴋosiningennik, ivlerserᴋovlunga tâpsominga naggatiksak tikkilugo.

³⁴ Illisalaunga, ivlerserᴋovlunga malligaksauᴋojarnik, nâlaᴋovlungalo makkoninga ômamut tamânut.

³⁵ Tassiulaunga perᴋojavît apᴋosiningane; tamanna ᴋuviagigapᴋo.

³⁶ Omattiga ᴋajungertilauruk kigligiutsinernut, pijomatudlarnermuungitorlo.

³⁷ Ijîkka ᴋeviartikik takkoᴋonnagik suksaungitomut; nakᴋoksitilaungale apᴋosinerne.

³⁸ Oᴋautsitit naᴋᴋiterᴋit kivgarnut, tunijaumajut sivuragijingnut.

³⁹ Kangusuktitaunek illimagijara sangutiuk uvamnit; idluarijattit inerᴋonarmatta.

⁴⁰ Ahâk pinniartauᴋojattit ᴋajungervigivakka; nakkoksitilaunga idluarnernut.

⁴¹ Nâlegak saimaveᴋarnît pigilago, ikajornît, oᴋautsitit malliklugit;

⁴² Kiojungnarᴋovlunga oᴋarnerlotigijimnik; oᴋautsitit sungertutigigapkit.

⁴³ ᴋannimnillo mikseᴋârnerub oᴋausingit pêrniarnagittôk; idluarijattit nerriugigapkit.

⁴⁴ Malligaksauᴋojattit nâlatsainaromavakka sorairnanga issoᴋangitomut.

⁴⁵ Arvertarpungalo ᴋuviasuklunga; pinniartauᴋojattit ᴋennerapkit.

⁴⁶ Kigligiutsinitit oᴋautigivakka attanît sângine, sillasiungilangalo;

⁴⁷ ᴋuviasutigivakkalo perᴋojattit ivlerilugillo.

⁴⁸ Aggakkalo ᴋongmuartipakka perᴋojarnut ivlerijamnut, idluarijattillo oᴋautigivakka.

⁴⁹ Kivgait erᴋaumavigiuk oᴋausernik sungertutigijauᴋojarnik uvamnut.

⁵⁰ Tamanna manigornerivara pattanganimne, oᴋautsivît nakkoksitimanga.

⁵¹ Piojorijut mittautigidlarpânga; sullele nûlungilanga malligaksauᴋojarnit.

⁵² Nâlegak erᴋarangama, ᴋannok igvit sillaksoaᴋarninganit idluarsailauravit, tagva manigortauvunga.

⁵³ Gûdeᴋangitut, malligaksauᴋojarnik ᴋemaijut illulugutigivakka.

⁵⁴ Idluarijattit imgerutigivakka arvertarnima iglungane.

⁵⁵ Nâlegak unnuarme attit erᴋaumavara, malligaksauᴋojattillo nâlakpakka.

⁵⁶ Tamanna pivianartoᴋutigivara, pinniartauᴋojattit nâlagapkit.

⁵⁷ “Nâlegak illangiusiarivara,” taimak oᴋarᴋattarpunga oᴋautsitit ivleritsainaromavlugit.

⁵⁸ ᴋennuvunga illingnut ômamut tamânut, saimarviginga angernît malliklugo.

⁵⁹ Apᴋosinikka nautsertorpakka; ittigakkalo torârtipakka kigligiutsinernut.

⁶⁰ Errinesukpunga, siglotonangalo perᴋojattit malligomavlugit.

⁶¹ Gûdeᴋangitoᴋattigêt illumavânga; uvanga malligaksauᴋojattit puigorlungilakka.

⁶² Unnuab ᴋetterarningane makkipunga, igvit ᴋujalivigivlutit idluarnivît idluarijangit pivlugit.

⁶³ Illûnainut illingnik sivurajunut piniartauᴋojarniglo nâlaktunut illauᴋattauvunga.

⁶⁴ Nâlegak, nuna nâmavok pitsiarnernik.

⁶⁵ Kivgait ajungitullivigivat, Nâlegak, oᴋautsitit malliklugit.

⁶⁶ Ajochertulaunga illutsinik innûlingnartunnik, illitarksinermiglo; perᴋojattit okperigapkit.

⁶⁷ Mannigotititaulauᴋârtinanga tammalaukpunga; mannale oᴋautsitit nâlakpakka.

⁶⁸ Igvit pitsiarpotit illanâᴋarlutillo, ajochertulaunga idluarijarnik.

⁶⁹ Piojorijut saglonernik issumertorpânga; uvangale pinniartauᴋojâttit nâlakpakka ômamut tamânut.

⁷⁰ Omattingit kinerput pujotut; uvangale malligaksauᴋojattit ᴋuviasutigivakka.

⁷¹ ᴋuviasukpunga manigotititaulaurama, illinialauᴋovlunga idluarijarnik.

⁷² Kanerpît malligaksauᴋojangit oeriginersarivakka kênaujannit Goldeojunnit Silbereojunnillo tausendinnit.

⁷³ Aggakpît sannalaukpânga âᴋilungalo; illisalaunga perᴋojarnik illiniarᴋovlunga.

⁷⁴ Sivurajut illingnik takkovânga, ᴋuviasuklutiglo; oᴋautsitit tattigigapkit.

⁷⁵ Nâlegak ᴋaujimavunga idluarsainitit idluarmatta, nertornarlutillo nikkanarsârtilauramga.

⁷⁶ Saimarveᴋarnît mannigortiksarilago, sorlo kivgait angervigilaurangne.

⁷⁷ Nâpkiningnît pigilerlago innôᴋovlunga; malligaksauᴋojâttit ᴋuviasutigigapkit.

⁷⁸ Piojorijut saglonernut okkungatitikka kangusuktitaulît; uvangale pinniartauᴋojattit oᴋautigivakka.

⁷⁹ Illingnik sivurajut, illitarksijullo kigligiutsinernik sâvigilinga.

⁸⁰ Omattiga nallâgôrlune idluarijarnêtsainarle kangusuktitauᴋonanga.

⁸¹ Tarnima piuliklernît kêmitigvigivâ; oᴋautsitit tattigivakka.

⁸² Ijîngma oᴋautsitit kêmitigvigigivait oᴋarlutiglo: Kakkugo mannigorniarpingâ?

⁸³ Pôktut amivineôjotut isserlungmêtotut-îlerajaralloaruma; idluarijattit puigorlungilakka.

⁸⁴ ᴋannok akkunêrtigijomik kivgait uttakkijuksauvâ? Kanga ômigijikka erᴋartoromavigît?

⁸⁵ Piojorijut ittersalliorpânga, malligaksauᴋojattit malliklugit illingalungitunik.

⁸⁶ Perᴋojattit mikseᴋârnetuinauvut. Tâpkoa unangmivânga saglonernut; iᴋajulaunga.

⁸⁷ Nungukasalaukpânga nuname; uvangale piniartauᴋojattit ᴋemmalungilakka.

⁸⁸ Nakkoksilaunga saimarvêᴋarnît malliklugo, ᴋannerpit kigligiutsininginnik nâlaᴋovlunga.

⁸⁹ Nâlegak oᴋautsitit issoᴋangitomut soᴋᴋosijuitsainarput ᴋillangme.

⁹⁰ Mikseᴋârnît îtsainaromârpok sorairane. Igvit nuna âᴋiksulaukpat, tâmnalo soᴋᴋosijuidlune tagvanêtsainarpok.

⁹¹ Sulle uvlome idluarijattit malliklugit illingavut; illûnamasiatik kivgartoriaᴋarmattit.

⁹² Malligaksauᴋojattit manigornerilaungikupkit, nungutaunajalaukpunga pattanganimne.

⁹³ Pinniartauᴋojattit puigoromatsangilakka; igvit nakkoksitigamga tâpkonunga.

⁹⁴ Perᴋotigivarma, iᴋajulaunga; pinniartauᴋojattit ᴋennerasuarapkit.

⁹⁵ Gûdeᴋangitut uttakkivânga innuaromavlunga; uvangale kigligiutsinitit kamagivakka.

⁹⁶ Tamaita pijut naggatiksangit takkolaukpakka; perᴋojattile îtsainarput.

⁹⁷ Ila angijomik malligaksauᴋojattit ivlerivakka! uvlut tamaita oᴋautigivakka.

⁹⁸ Perᴋojavît illissimanersautipânga ômigijimnit; perᴋutigitsainarapkit issoᴋangitomut.

⁹⁹ Kaujimanersauvunga ajochertortimnit tamainit; kigligiutsinitit issumaksarsiorutigigapkit.

¹⁰⁰ Sillatunersauvunga inutoᴋaujunnit; piniartauᴋojattit torᴋorapkit.

¹⁰¹ Ittiggakka attortailitipakka apᴋosinernik idluitunnik tamainik, nâlaᴋovlunga oᴋausernik.

¹⁰² Nûlungilanga idluarijarnit; igvit ajochertoramga.

¹⁰³ Oᴋautsitit ᴋannimnut mamanersauvut igupsaujârtut orksunginnit.

¹⁰⁴ Piniartauᴋojarnut sillatotitauvunga; tamanna pivlugo apᴋutit tammarnartut tamaita ômigivakka.

¹⁰⁵ Ittikkama oᴋautsitit ᴋaumaksaitigivait, ᴋaumaniolutiglo apᴋosinimne.

¹⁰⁶ Angermarikpunga malligomavaralo, idluarnivit idluarijangit torᴋoromagapkit.

¹⁰⁷ Angijomik manigotititaumavunga; Nâlegak nakkoksitilaunga oᴋautsitit malliklugit.

¹⁰⁸ Nâlegak kanerma tunnergutingit pijarijut ᴋuviagijaulît illingnut; ajochertulaungalo idluarijarnik.

¹⁰⁹ Tarniga tigumiatsainarlugo akjarpara; malligaksauᴋojattillo puigorlungilakka.

¹¹⁰ Gûdeᴋangitut nigartorpânga; uvangale tammarlungilanga pinniartauᴋojarnit.

¹¹¹ Kigligiutsinitit kingormgutijarivakka issoᴋangitomut ômattima erᴋiêrtorutigingmagit.

¹¹² Omattiga sangutipara, idluarijattit malliklugit piniatsainaromavlunga issoᴋangitomut.

¹¹³ Annerneggit nakkimârnijunik ômigivakka, malligaksauᴋojattillo ivlerivakka.

¹¹⁴ Igvit serngnigijigivagit sappulutarilutillo; oᴋautsitit tattigivakka.

¹¹⁵ Aularitse uvamnit kassêtose; Gûdima perᴋojangit nâlagomavakka.

¹¹⁶ Angernerilauktat malliklugo inôseᴋainartilaunga; kangusuktitauᴋoniarnangalo tatteᴋarnera pivlugo.

¹¹⁷ Nakkoksitilaunga atsuilerᴋovlunga; tagva idluarijattit kamagitsainaromavakka.

¹¹⁸ Tullerarpattit illûnaita idluarijarnik tammaijut; uivêriklerningit sagloniôtuinaumatta.

¹¹⁹ Gûdeᴋangitut nunamêtut illûnaita pêjarpattit piunginerlukutitut; tamanna pivlugo kigligiutsinitit ivlerivakka.

¹²⁰ Erksigapkit ᴋêungomivunga idluarijatillo kakkilârutigivakka.

¹²¹ Idluarnek idluarsainerlo attorpâka; illingatiniarnanga aksorortitimnut.

¹²² Igvit kivgait akkisartutsialauruk namanerpângôjomik, piojorijut aksorotjiᴋonnagit uvamnik.

¹²³ Ijîngma piuliklernît kêmitigvigivâk, idluarnivîllo oᴋausertangit.

¹²⁴ Kivgait pinniarvigiuk saimarviᴋarnît malliklugo, ajochertorlaungalo idluarijarnik.

¹²⁵ Kivgarivarma; illisalaunga, kigligiutsinernik illitarksilerᴋovlunga.

¹²⁶ Nâlekab piniârvinga nalliusimavok; malligaksauᴋojattit serᴋomilaukpait.

¹²⁷ Tamanna pivlugo perᴋojattit ivlerinersarivakka Goldemit, Goldemillo illaᴋangimariktomit.

¹²⁸ Tamanna pivlugo piniartauᴋojaujut illûnâne nâlamarikpakka, apᴋosinerlo tammarnartok tamât ômigivara.

¹²⁹ Kigligiutsinitit tattamnadlarput, tamana pivlugo tarnima nâlakpait.

¹³⁰ Nallonarungnaititaunek oᴋausernik ᴋaumaksaivok, sillatotitsilunelo illissimailingajunik.

¹³¹ Kanera aitarpara ᴋêlerlungalo; perᴋojattit ᴋajungervigigapkit.

¹³² Sâviginga saimarvigilungalo; sorlo tâpkoa pinniarvigivakangne atternik naglingniktut.

¹³³ Arvertarnera nallonangilerle oᴋauserne, idluanginerlo nalliallonêt attanniotitailitiuk uvamnut.

¹³⁴ Piulilaunga Inuit pinniarlungninginit; tagva pinniartauᴋojattit nâlagomavakka.

¹³⁵ Nâlegak kênavît kivgait ᴋaumaksarliuk, ajochertulaungalo idluarijarnik.

¹³⁶ Ijîka kôktitsivuk kôngnik malligaksauᴋojattit nâlaktaulungimatta.

¹³⁷ Nâlegak igvit idluarpotit, idluarsainitillo idluarput.

¹³⁸ Idluarnivît kigligiutsiningit, mikseᴋârnerlo angijomik perᴋolaukpattit.

¹³⁹ Toᴋᴋokasalaukpunga illungertornermut, akkerartortima oᴋautsitit puigormagit.

¹⁴⁰ Oᴋautsitit illaᴋarungnaitisimatsiarput, kivgavîllo ivlerivait.

¹⁴¹ Erᴋanangitôvunga nachogijaulungalo; pinniartauᴋojattit puigorlungilakka.

¹⁴² Idluarnît idluarniôvok issoᴋangitok, malligaksauᴋojattillo mikseᴋârniôvut.

¹⁴³ Kappiasungnerub siorniornerublo uvigalaukpânga; perᴋojattille ᴋuviasutigivakka.

¹⁴⁴ Kigligiutsinivît idluarninget issoᴋangitôvok; illisalaunga, innôniarpunga tagva.

¹⁴⁵ Omamut tamânut nipliadlarpunga; tussalaunga Nâlegak, idluarijarnik mallerᴋovlunga.

¹⁴⁶ Nipliadlarpunga illingnut, iᴋajulaunga kigligiutsinernik nâlaᴋovlunga.

¹⁴⁷ Uvlarârsukut ᴋaugiarnerme ᴋaivunga, nipliadlalungalo; oᴋautsitit tattigivakka.

¹⁴⁸ Uvlogatârnekut unnuarme tuppakpunga, oᴋautsitit oᴋautigijomavlugit.

¹⁴⁹ Nippiga tussalauruk saimarvêᴋarnît malliklugo; Nâlegak nakkoksilaunga idluarnît malliklugo.

¹⁵⁰ Unangmijikka kassêtut uvamnûromavut, ungasiklutiglo malligaksauᴋojarnit.

¹⁵¹ Nâlegak igvit ᴋannipotit, perᴋojattillo mikseᴋârnetuinauvut.

¹⁵² Akkunît ᴋaujimavunga kigligiutsinernit, issoᴋangitome tunganilitilaurangne.

¹⁵³ Pattanganera takkonâruk ikajorlungalo tamattomangat; malligaksauᴋojattit puigorlunginapkit.

¹⁵⁴ Illiornera aulatilauruk, piulilungalo; nakkoksitilaunga oᴋautsitit malliklugit.

¹⁵⁵ Piulijaunek ungasikpok Gûdeᴋangitunnit; idluarijattit ᴋennerlungimagit.

¹⁵⁶ Nâlegak nâpkoarosungnît angijôvok; nakkoksitilaunga idluarijattit malliklugit.

¹⁵⁷ Unangmijikka akkerartortikkalo unnuktôvut; uvangale nûlungilanga kigligiutsinernit.

¹⁵⁸ Nachojut takkovakka, ᴋassilinarporlo uvamnut, oᴋautsitit nâlalungimagit.

¹⁵⁹ Ahâk pinniartauᴋojattit ivlerivakka; Nâlegak nakkoksilaunga saimarviᴋarnît malliklugo.

¹⁶⁰ Oᴋautsitit mikseᴋârnetuinauvut; idluarnivîllo idluarijangit issoᴋangitôvut illûnatik.

¹⁶¹ Attanît pitjuteᴋaratik unangmivânga, ômattimale oᴋautsitit sivuragivait.

¹⁶² Oᴋautsitit ᴋuviasutigivakka, kinatut perᴋutevaksoasijotut.

¹⁶³ Saglonerit ômigivakka makkojugilugillo; malligaksauᴋojattille ivlerivakka.

¹⁶⁴ Uvlorme attautseme nertorpagit sepaitorlunga, idluarnivît idluarijangit pivlugit.

¹⁶⁵ Angijomik ullapirsauteᴋarput malligaksauᴋojarnik ivlersijut, koitarniangilallo.

¹⁶⁶ Nâlegak piuliklernit uttakᴋivara, pinniarlungalo perᴋojattit malliklugit.

¹⁶⁷ Tarnima kigligiutsinitit nâlakpait, ivleridlalaitalo.

¹⁶⁸ Piniartauᴋojattit kigligiutsinitillo nâlakpakka; apᴋosinerijakka illûnatik sângnêmatta.

¹⁶⁹ Nâlegak ârusungnera ᴋaglilerle sângnut; illisalaunga oᴋautsitit malliklugit.

¹⁷⁰ ᴋennunera tikkile sângnut; piulilaunga angernît malliklugo.

¹⁷¹ Kangasinâka kôktitsijuksauvuk nertordlernermik, igvit ajochertorumga idluarijarnik.

¹⁷² Oᴋama oᴋautsitit oᴋauserijaksarivait; perᴋojattit illûnatik idluarniôngmatta.

¹⁷³ Aggakpît illilertorlinga; pinniartauᴋojattit annerilaurapkit.

¹⁷⁴ Nâlegak piuliklernit ᴋajungervigivara, malligaksauᴋojattilo erᴋiêrtorutigivakka.

¹⁷⁵ Tarniga innôle, nertordlerᴋovlugo illingnik, idluarijattillo ikajorᴋovlugit uvamnik.

¹⁷⁶ Sanguerpunga saugaktut assiomajotut, kivgait ᴋennilauruk; perᴋojattit puigorlunginapkit.