Imgerut 118 - Labrador Inuttitut Heritage Bible

ᴋujalijutiksak takkonârnerme Messiasemik.

¹ Nalegak ᴋujagissiuk illanâᴋarmat, pitsiarningalo îtsainarpok issoᴋangitomut.

² Israelitit manna oᴋarlît: Pitsiarninga îtsainarpok issoᴋangitomut.

³ Aronekut manna oᴋarlit: Pitsiarninga itsainarpok issoᴋangitomut.

⁴ Nâlekamik sivôrajut manna oᴋarlît: Pitsiarninga îtsainarpok issoᴋangitomut.

⁵ Kappiasungnerme Nâlegak nipliavigilaukpara, Nâlekablo tussalaukpânga piulilungalo.

⁶ Nâlekab aiparivânga, tamanna pivlugo sivôralungitunga; sunamik Inuit pinniarvigijungnarpângâ?

⁷ Nâlekab aiparivânga ikajoromavlunga; ᴋuviasutiksaralo takkojomavara ômigijimne.

⁸ Namanersauvok Nâlegak tattigilugo, sungertuteᴋarnermit innungnik.

⁹ Namanersauvok Nâlegak tattigilugo sungertuteᴋarnermit attannernik.

¹⁰ Nallojut illûnatik illumavânga; Nâlekable attingane ullimârlugit serᴋomitsomavakka.

¹¹ Illumavânga illûnâne; Nâlekable attingane ullimârlugit serᴋomitsomavakka.

¹² Illumavânga igupsaujârtutitut; isserlukput ikkomatut orpine kakkilautilingne; Nâlekable attingane ullimârlugit serᴋomitsomavakka.

¹³ Pingujartauvunga ochoᴋojomavlunga; Nâlekable ikajorpânga.

¹⁴ Nâlegak sôngonerivara, imgerutigivaralo, piulijigilâlo.

¹⁵ Igiaᴋomijarnermut piulijaunek imgerutigijauvok idluartut iglunginne; Nâlekab tallerpia sâlaᴋatsainarpok.

¹⁶ Nâlekab tallerpia ᴋongmuartitaumavok; Nâlekab tallerpia sâlaᴋatsainarpok.

¹⁷ Toᴋᴋoniangilanga, innônialungale, Nâlekablo pinniarningit oᴋautigilugit.

¹⁸ Nâlekab ᴋaujisaralloarpânga tunnilungilângale toᴋᴋomut.

¹⁹ Idluarnerub upᴋoaksoangit upkoêsigik uvamnut, tagvunga itterᴋovlunga, Nâlegarlo ᴋujagilugo perᴋovlunga.

²⁰ Tagva Nâlekab upᴋoaksoango; idluartut tagvunga itteromârput.

²¹ ᴋujagivagit manigotitigamga, iᴋajulungalo.

²² Ujarak igluliortut nachogijangat, tâmna ujarangornerpok terreᴋomut.

²³ Nâlekab tamanna pinialaukpâ tattamnartôlunelo ijipta sângine.

²⁴ Tagva uvlôvok Nâlekab sannajanga; ᴋuviasukta serrilutalo tâpsomane.

²⁵ Nâlegak iᴋajulaurittôk! Nâlegak sullitsiartitsilaurittôk!

²⁶ Nertortaule tikkitok Nâlekab attingane! Saimausertauᴋovapse illipse Nâlekab iglunganut illingajose.

²⁷ Nâlegak Gudeôvok, ᴋaumaksartivut. Uvloksiorvik pinnarnarsisiuk ᴋessertutinik milluᴋattalingnik, Altarib naksungit tikkidlugit.

²⁸ Igvit Gûdigivagit, ᴋujagivagillo, Gûdîk nakorijomavagit.

²⁹ Nâlegak ᴋujagissiuk illanâᴋarmat, pitsiarningalo îtsainarpok îssoᴋangitomut.