Imgerut 115 - Labrador Inuttitut Heritage Bible

Gûdiojub nallâgôrtub pitsiarninga ojugaᴋangitok; nallojut Gûdingoangita suksaunginingit.

¹ Uvaguungitok Nâlegak, uvaguungitok, attîlle opigijauneartiuk, saimarviᴋarnît mikseᴋârnîllo pivlugik.

² Sôg nallojut oᴋartuksauvât Gûdingat nanêᴋa mânna?

³ Gûdivulle ᴋillangmêpok; pingortitsijungnarpok issumagijaminik.

⁴ Taipkoa gûdingoangit Silbereôvut, Goldeôlutiglo sannajaumajut Inuit agganginnut.

⁵ Kanneᴋarput oᴋaratiglo; ijearput tautugatiglo;

⁶ Siuteᴋarput tussaratiglo; ᴋingaᴋarput nainatiglo;

⁷ Aggaᴋarput tigussinatiglo; ittiggaᴋarput, pissugatiglo; nippeᴋaratiglo torklumikut.

⁸ Taimaitunnik sannajut taimaikoarivait; illûnatiglo sungertuteᴋartut tâpkoninga.

⁹ Israelitille Nâlegak sungertutigilitsuk; tâmna ikajortigivât, sappulutarilugolo.

¹⁰ Aronekut Nâlegak sungertutigilitsuk; tâmna ikajortigivât sappulutarilugolo.

¹¹ Nâlekamik sivurajut Nâlegak sungertutigilitsuk; tâmna ikajortigivât sappulutarilugolo.

¹² Nâlekab erᴋaumavâtigut pitsartutilutalo; Israelekut pitsartutipait, Aronekut pitsartutipait;

¹³ Nâlekamik sivurajut pitsartutipait, tamarmik, mikkijut angijullo.

¹⁴ Nâlekab pitsartutipallialerlise, illipse ᴋittorngaselo.

¹⁵ Illipse pitsartutitauvose Nâlekamut, ᴋillangmik nunamiglo pingortitsijomut.

¹⁶ ᴋillait tamaita Nâlekab perᴋutigivait, nunale tunnilaukpâ Inuit ᴋittornganginnut.

¹⁷ Toᴋᴋungajut Nâlegak nertorniangilât, tâpkoalonêt unungartut tussarviᴋangitomut.

¹⁸ Uvagulle Nâlegak nertoromavavut mânnamit issoᴋangitomut. Hallêluja.