Imgerut 112 - Labrador Inuttitut Heritage Bible

Idluartut aitornigajuktullo pilloringninget.

¹ Hallêluja. Pillorikpok Nâlekamik sivôrajok, ᴋuviasuteᴋadlartok tâpsoma perᴋojanginnik.

² Tâpsoma kinguvângit sôngojomârput nuname; idluitailijut kinguvârêngit pitsartutisimajomârput.

³ Akluinek pittaᴋaloringnerlo iglunginêtsomârpuk, idluarningallo itsainaromârpok issoᴋangitomut.

⁴ Idluitailijut nuiviôvut ᴋaumajomik târtome, saimarveᴋarosuktomit nâpkoarosuktomillo idluartomillo.

⁵ Pillorikpok nâpkoarosuktok, attarksiviôjorlo ᴋununane, pinniaraksaminiglo pinniartok idluarnerme.

⁶ Itsainaromârame issoᴋangitomut; idluartok puigortauniatsangilak.

⁷ Tussaumajaujut kappianartut erksigingilait; ômattinga mungojuidlune sungertuteᴋarpok Nâlekamik.

⁸ Omattinga maksoavok sivôrajuilunelo; takkoᴋârane ᴋuviasutiksaminik ômigijimine.

⁹ Kangasuivok tunnijilunelo aklujunut; idluarninga îtsainarpok issoᴋangitomut; naksunga ᴋongmuartitauvok nertortauvlune.

¹⁰ Gûdeᴋangitub tamanna takkojomârpâ kangârutigijomârpâlo; kiggutine kêtitsomârpait nungujomârlunelo. Gûdeᴋangitut tussuninget assiômangmat.