Imgerut 111 - Labrador Inuttitut Heritage Bible

ᴋujalijutiksak Gûdib ajungitulliningit timiptingnut tarniptingnullo pivlugit.

¹ Hallêluja. Nalegak ᴋujagivara ômamut tamânut, idluitailijut ᴋachimioningine illagêktunnelo.

² Nâlekab pinniarningit angijôvut, makkoninga kamajub ᴋuviagidlarpait.

³ Tâpsoma pinniarninga nertornarpok ânanaudlarlunelo, idluarningalo itsainaromârpok issoᴋangitomut.

⁴ Tattamnartullinime erᴋaumajauninganik âᴋiksoilaukpok Nâlegak saimarveᴋarosuktok nâpkigosuktorlo.

⁵ Nerᴋiksamik tunnijivok tâpkonunga sivoragijiminut; angersimanine erᴋaumatsainarpâ issoᴋangitomut.

⁶ Pinniarnersoane oᴋautigivait inuᴋotiminut, tunnijerᴋovlugo tâpkonunga nallojut kingormgutijangenik.

⁷ Aggangita pinniarningit mikseᴋârniôvut, idluarneôlutiglo, perᴋojangit illûnatik soᴋᴋosijuiput.

⁸ Itsainartitauvut issoᴋangitomut; malliktaulutiglo nertornartomik nallâgôrtomiglo.

⁹ Piuliklernek tillikliutivâ innuᴋotiminut; angerpok angersimaninga îtsainartuksaungmat issoᴋangitomut, Attinga ivsornaitoksôvok, opinartoksôlarmelo.

¹⁰ Sivôranek Nâlekamik pigiarneôvok illissimanermut; tamanna sillatutsiarniôvok, taimailiorlune pijub, tâpsoma nertortauninga îtsainarpok issoᴋangitomut.